Адам капиталы – ел дамуының негізі

Кез келген мемлекеттің тұрақты дамуы оның табиғи ресурстарымен ғана емес, ең алдымен адамдарының біліміне, қабілетіне және кәсіби әлеуетіне байланысты.

Қазақстанның конституциялық даму бағдарында адам капиталын жетілдіруге, білім мен ғылымды дамытуға, еңбек пен жасампаздықты қолдауға басымдық беріледі.

Білімді әрі кәсіби маман – экономиканың негізгі қозғаушы күштерінің бірі. Сондықтан сапалы білім беру, жаңа кәсіптерге бейімдеу, кәсіби-техникалық даярлықты күшейту және заманауи құзыреттерді қалыптастыру ел дамуының маңызды шарттарына айналып отыр.

Әсіресе жастарға жаңа мүмкіндіктер ашу маңызды. Бүгінгі жас маманның цифрлық сауаттылығы, технологиялық білімі, шығармашылық ойлауы және кәсіпкерлік қабілеті – ертеңгі экономикалық өсімнің негізі.

Адамға, білімге және қабілетке салынған инвестиция – елдің болашағына салынған инвестиция. Конституцияның даму философиясы да осы ұстаныммен үндеседі.

СҰЛТАНБАЕК ГАБИБОЛАТОВ,

Арал ауданы, Құланды ауылдық округінің әкімі