Әр әзілдің астарында шындық бар

...Аралдан Алматыға арман қуып аттанған бозбала Құдайберген өнерлі ортаға түсті. Ол өнер мен мәдениеттің қадір-қасиетін білетін жандардың ортасы еді. Өз-өзін шыңдай білді. Кемел шақ кезеңдерінде ол бойына адамгершілік пен парасаттылық, кісілік пен кішіліктің жарқын қасиеттерін жинай алды. Атақты актер Аркадий Райкиннің қолынан бас жүлдені алған, ұлы режиссер Әзірбайжан Мәдиұлы Мәмбетовтің мектебінен, яғни, «школасынан» өткен, ұлы жүректі актриса Сәбира Майқанова сынды апайының сүйіктісіне айналған, ұлы Асанәлі Әшімов, Әнуар Молдабеков, Есболған Жайсаңбаев ағаларымен кемеңгер сахнада бір болған, Әнуар Боранбаев, Тұңғышбай Жаманқұлов, Мейірман Нұрекеев сынды, «Тамашаның» бас режиссері Лұқпан Есенов сынды тұлғалармен дос-замандас болған Құдайберген Сұлтанбаев қазақ өнерінде өзіндік қолтаңбасын қалдырды.
Көрнекті актер ретінде кино өнерінде де өзіндік із қалдырды. Режиссер С.Нарымбетовтың бірнеше фильмінде, сондай-ақ Б.Шамшиевтің «Көктөбедегі кез­десу», З.Подольскийдің «Қош бол, Медеу», С. Тәуекелдің «Махамбет», Р.Әбдірашевтің «Қаладан келген қыз», «Құрақ көрпе» және тағы да басқа көркем фильмдерде әрқилы да қызғылықты бейнелер жасады. М.Әуезов атындағы Қазақ мемлекеттік академиялық драма теа­тры­ның сахнасында көптеген бейнелерді сомдады. Со­ны­мен қатар ән салып, бірнеше аспаптарда да ойнады. Суретшілік өнерден де кенде болмады. Қазақ Ұлттық Т.Жүргенов атындағы Өнер академиясында ұстаздық қызмет атқарды. Құдайберген Сұлтанбаев 1995-1999 жылдар аралығында ҚР Парламентінің депутаттығына сайланды. Ол осы кезеңде ел үшін өзекті мәселенің бірі – Арал проблемасына ерекше назар аудартып, сайлау­шыларының аманатын орындаған еді.
Сан қырлы өнер иесі Қ.Сұлтанбаевтың ерекше таланты сатира жанрында жарқырай көрінді. Көрер­меннің көпшілігі оны алдымен «Тамаша» ойын-сауық бағдарламасы арқылы жақсы таныды. Бұл тұста осы отаудың іргесін қалаушылардың бірі болған актер көрерменді хас өнерімен сусындатты.
Жақында облыстық халық шығармашылығын да­мыту және мәдени-продюсерлік орталығы Арал аудан­дық мәдениет және тілдерді дамыту бөлімімен бірлесе отырып, қазақ сатирасына елеулі үлес қосқан талантты актер, Қазақстанның халық әртісі, Бүкілодақтық эстра­да әртістері конкурсының лауреаты, көрнекті актер, ұлағатты ұстаз Құдайберген Сұлтанбаевтың шы­ғар­машылығын насихаттау арқылы бүгінгі жастар арасында сатира өнеріне деген оң көзқарас пен қызы­ғушылықты қалыптастыру мақсатында «Күлкі думан» атты әзіл-сықақ отауларының облыстық бай­қауын өткізді.
Байқауға ауданымыздағы «Алдаспан», «Мысқыл», «Тамаша» және  Қазалы, Қармақшы, Жалағаш, Шиелі аудандарының әзіл-сықақ отаулары, яғни барлығы 9 өнер ұжымы қатысып, бақ сынады. Өнерпаздар кезеңде қазіргі кездегі өзекті мәселелер туралы қойылымдар мен интермедияларды, сондай-ақ пародия, монолог, пан­томима және басқа да түрлі жанрда өнерлерін көр­сетті. Көпті күлкіге қарық қылған әрбір әзілдің астарында шындық бар еді. Көрермендерді шынайы өмір көріністерінен алынған мағыналы да мәнді қойы­лымдары арқылы көтеріңкі көңіл күйге бөлеген бай­қауда Арал аудандық мәдениет үйі жанындағы «Та­маша» халықтық әзіл-сықақ отауы бас жүлдені жеңіп алды. Ал, қазылар алқасының шешімімен Қармақшы ауданы Ақай ауылының «Достар-ай» әзіл-сықақ отауы І орынды, Шиелі ауданының «Қытық» халықтық әзіл-сықақ отауы ІІ орынды иеленсе, Арал ауданы Аманөткел ауылының «Алдаспан» халықтық әзіл-сықақ отауы мен Жаңақорған ауданынан «Күлеміз бе, қайтеміз» әзіл-сықақ отауы және Қармақшы ауданынан «Сүйінші» әзіл-сықақ отауы ІІІ орыннан көрінді. Мұнан өзге, байқауда өнер көрсеткен Жаңақорған ауданының «Жа­ңаша» халықтық әзіл-сықақ отауы, Арал ауданы Қызыл­жар ауылының «Мысқыл» және Жалағаш ауданының «Әзілизация» әзіл-сықақ отаулары Алғыс хатпен марапатталды.
(Өз тілшімізден).