Қоғамнан оқшаулатпайық!
Адам құндылығын жеке тұлға ретіндегі мойындауды, оның қадір-қасиетін құрметтеуді, қоғамдық прогресс мақсаты ретінде адамның игілікке ұмтылысын білдіретін ізгілік – пробацияның негізгі қағидаттарының бірі. Латын тілінен аударғанда «сынау» деген мағынаны білдіретін пробация қызметінің негізінен әлеуметтік көмек көрсету сипаты басым екені белгілі. Бас еркінен айырмайтын жазаға кесілген немесе мерзімінен бұрын шартты жазаға босаған сотталушыны бақылап және тексеріп қана қоймай, оған еркін өмірге бейімделуге, жұмысқа орналасуына, білім алуына көмектесу – пробация қызметкерлерінің міндеті.Қылмыстық жазаларды ізгілендірудің тиімді жолдарының бірі осы пробация қызметі десек, бүгінде бұл қызметтің тұғыры бекіп, жазалы жандардың жанашырына айналып үлгерді. Осындай жаңа бастаманың жетілуі үшін Арал аудандық пробация қызметінің есебінде тұрған қоғамнан оқшаулаумен байланысты емес жаза түріне сотталғандарды, яғни бас бостандығын айырмай, қоғамнан оқшауламай сот үкімдерімен жеңіл жаза тағайындалғандарды қатыстыра отырып, олардың өз қолдарымен жасалған бұйымдарын көрсету мақсатында, Арал аудандық мәдениет үйінде «Қолөнер – ұлттық құндылық» атты қолөнер көрмесі ұйымдастырылды. Бұл көрменің қателескен жандардың өмірге қайта бейімделуіне ықпалы зор.
Көрме соңында қатысушылардың еңбегі бағаланып, ынталандыру мақсатында Алғыс хат және сыйлықтармен марапатталды.
Жалпы, пробациялық қызметтің мақсаты – шартты түрде бас бостандығынан айырылған азаматтарға әлеуметтік-құқықтық қызмет көрсету. Олай болса, Ендеше, өмірде сүрінгендердің бәрін түрмеге тоғытпай, қоғамда бейімделуіне мүмкіндік берудің де игілікті іс екенін естен шығармаған жөн. Әрине, пробация қызметінің құрылғанына көп уақыт өте қойған жоқ. Десе де, қоғамнан оқшауламай-ақ, оларға барынша кеңінен қолдау көрсетуге көптеген жұмыстар атқарылып келеді. Бұл – тура жолдан адасып, жазалы болған азаматтарға деген ізгілікке толы қамқорлық. Олардың түзеліп, қоғамның бір бөлшегіне айналады деген берік сенім бар. Сол себепті, біз үшін оларды қоғамнан алыстатпай, заман талабына сай жасаған жұмыстарын бағалаудың маңызы зор.С. Сейталиев,
Арал аудандық пробация қызметі бөлімінің бастығы әділет майоры
