АЛИМЕНТ ТӨЛЕУ – АЗАМАТТЫҚ БОРЫШ

  Елімізде әрбір ата-ана өздерінің кәмелет жасқа толмаған балаларын асырап-бағуға міндетті екендігі Заң жүзінде айқындалған. Бекітілген заңымыздан бөлек бауыр еті баласын толыққанды қамтамасыз ету адамгершілік тұрғыдан да заңдылық екені белгілі. Десе де, алимент төлеуден жалтарған азаматтардың қатары күн санап артып келеді. Соның ішінде, борышкерлердің алиментті қалтасында ақшаның жоқтығынан емес, баласының өміріне немқұрайлы қарағаннан төлемей, әкелік атқа дақ түсіретіні өкінішті. Ал, оларға алиментті өндірудің бірден-бір жолы борышкерлерді жұмыспен қамту екені белгілі.  Осы орайда күні кеше З.Шүкіров атындағы қалалық мәдениет үйінің ғимаратында аудандық прокуратураның бастамасымен және аудан әкімдігінің қолдауымен «Борышкерді жұмыспен қамту» тақырыбында жәрмеңке ұйымдастырылды.
  Жәрмеңкеге аудан бойынша алимент өндіру санатындағы борышкерлердің 32-сі шақыртылса, оның 7-уі ғана аталған шараға қатысуға ниет білдірді. Жәрмеңке аясында 4 мекеме 57 бос жұмыс орнын ұсынып, бір борышкер азамат тұрақты жұмысқа орналасса, 3 азамат құжаттарын рәсімдеу үстінде, ал 3 борышкер ұсыныстан бас тартқаны жасырын емес. Осы тұста айта кету керек, алимент төлеуден қасақана жалтарушылар алдағы уақытта әкімшілік жазаға тартылатын болады.
  Өйткені, бұл арада басты мақсат – кінәсіз балалардың болашағына немқұрайлық танытушыларға жауапкершілік жүгін түсіндіру болып отыр.
Аудан әкімінің баспасөз қызметі