«Жануарлардың жұқпалы індеттерінің алдын алу маңызды»

ҚР АШМ Ветеринариялық бақылау және қадағалау комитетінің2018 жылғы 4 желтоқсандағы № 184, 2018 жылғы 15 қазандағы № 138 бұйрықтарына сәйкес Арал ауданының 2019 жылға арналған жануарлардың аса қауіпті ауруларының профилактикасы және жануарлардың аса қауіпті ауруларының диагностикасы бойынша ветеринариялық іс-шаралардың жоспарлары бекітіліп, жұмыстар жүргізілуде. Осы жұмыстар бюджеттен қаржыландырылады және аудандағы эпизоотиялық тұрақтылықты қамтамасыз етудегі маңызы өте зор. Бұл жоспар аясында төрт түлік малдың сібір жарасы, аусыл, құтыру, түйе обасы, күл сияқты қауіпті індеттерді болдырмау мақсаты қойылған.

Сонымен қатар, жұқпалы індеттердің диагностикасы да айтарлықтай тиімді нәтиже көрсетуде. Мәселен, диагностикалық жұмыстар барысында осы уақытқа дейін 5 бас мүйізді ірі қара малынан және 5 бас уақ малдан сарып індеті анықталды. Осы күнге дейін 5 бас мүйізді ірі қара мал санитариялық талаптарға сәйкес аудан орталығындағы мал сою алаңында сойылса, 5 бас уақ мал аудан көлемінде санитариялық өңдейтін кәсіпорын болмағандықтан, Арал аудандық ветеринария бөлімі Түркістан облысы, Түркістан қаласында орналасқан өңдеуші кәсіпорын «Түркістан» СТК ЖШС-мен мен меморандумға отырып, сол жерлерге уақ малдардың ұшалары өткізілді.

Адамзат баласына зардабы орасан сарып ауруының қатерлілігі – ауруға шалдыққандарға дер кезінде медициналық ем қолданылмаса мүгедектікке ұшырап, жартылай немесе толық жарымжан ететіндігін айта кету керек. Сондықтан-да, сарып індетімен күрестің стратегиясы да жаңаланып, жаңа бағыттар мен заман талабына сай іс-қимылдар енгізілді.

К.Жалимбетов, 

ҚР АШМ ВБжҚК Арал аудандық аумақтық

инспекциясының бас маманы