Сағындырған әндерді әуелеткен байқау
«Құлақтан кіріп бойды алар, әсем ән мен тәтті күй. Көңілге түрлі ой салар, әнді сүйсең менше сүй» - деп ұлы ойшыл, кемеңгер ақын, композитор Абай атамыз айтқандай, тыңдағанда бүкіл жан дүниеңді тербетіп, тұңғиық ойға жетелейтін, ата-анаға, туған елге, Отанға деген адал патриоттыққа баулыған, еліміздің өнер тарихында орны биік, рухы мықты, сан қырлы әсем әндеріміз қаншама десеңізші?! Әсіресе кешегі 1960-90 жылдардың қиын-қыстау кезеңінде болашақ өмірге жетелеп, бірлігімізді, елдігімізді сақтап қалуға шақырып, зор әсерін тигізген рухани мұралардың шоқтығы бір бөлек еді ғой. Көш бастаған дарынды композиторлардың мәңгілік шырқалар сағынышқа толы керемет әсем әндерін сол кезеңнің куәгерлері әлі ұмыта қойған жоқ. Іздеп жүріп тыңдайтындар да жоқ емес.Жақында сол бір кезеңнің сағынышқа толы сазды әуендеріне жан бітіріп, жүздің бірін таңдауға мүмкіндік туғызған «Сағындырған әндер-ай!» атты күміс көмей әншілердің аудандық байқауы «Рухани жаңғыру» бағдарламасы аясында болып өтті. Байқаудың әділ өтуіне ұйтқы болып, таза өнерді тануға талпынған қазылар алқасының құрамында қазылар алқасының төрағасы, ауданға, облысқа белгілі өңдеуші-музыкант Н.Қайырлапов. облысқа белгілі әнші Г.Матығұлова. Сыр өңіріне белгілі музыкант, Қазанғап атындағы халық-ұлт аспаптары оркестрінің дирижеры Е.Қадырқұлов. Сондай-ақ, «Сағындырған әндер-ай»аттыаудандық ретро ән байқауында Қазанғап халық ұлт аспаптары оркестрінің көркемдік жетекшісі, Сыдықовтар отбасылық халық ансамблінің мүшесіЖандос Сыдықовтың есемі ерекше аталды. Себебі ол аталған ретро ән байқауының сценарийін жазып, дайындаған.Сонау 1970-1990 жылдар аралығында көпшіліктің көңіл пернесін басып, бойын билеген ән әлемінің үздік туындыларын әсірелеп орындаған өнерпаздар саны жиырмадан асты. Барлығы да бойына өнер, көмейіне бұлбұл ұялаған жауһар өнердің жаршылары. Тыңдарманның құлақ құрышын қандырып, әннен шашу шашқан өнерпаздар арасындағы сайыста бас жүлде «Қызылжар дуэті» Е.Едігеев пен А.Сембаевқа бұйырды. I орындыШөмішкөл елді мекенінен Д.Сейілхан еншіледі. II орындарды Аманөткел елді мекенінен Н.Лайық пен Сексеуіл кентінен Б.Шыназ алса, үш бірдей жүлделі үшінші орындарға құмбазарлық Қ.Қаршыға, Жақсықылыш кентінен Ж.Махамбетова мен ақеспелік Б.Сәтжановтар лайық деп танылды.
А.Аманов.
