Жағасы көл, ырысы мол Қамыстыбас
Әлемде туризм дамыған елдер көп, әрине. Жыл сайын шет елге арнайы барып демалатын адамдар да жетерлік. Соның ішінде көбіне Дубай, Түркия елдері, Мальдив аралдарына барушылар саны көп. Ал елімізде Көкше мен Алакөлден, Каспий теңізінің жағалауынан бөлек Қамбаш көлі жайлы не білеміз бе? Бүгінде көпшілік көзайымына айналған Қамбаш көлі туралы сөз қозғауды жөн көрдік.Ауданда кенже дамыған саланың бірі болса да, Қамбаш көлі тынығушыларға жан тыныштығын сыйлауға үлкен мүмкіндік тудырды. Аудан экономикасының қарқынды ілгерілеуіне ғана септігін тигізбей, Аққұмшық жағажайы келушілердің де көңілінен шығып, суға түсу маусымында тек аудан, облыс көлемінде ғана емес, республика бойынша мыңдаған тынығушының жайлы орнына айналды. Расымен де, Қамбаш көліне арнайылап сырт қаладан келетін халық саны жыл сайын артпаса, азайған емес.
Жалпы Қамыстыбас ауылындағы «Аққұмшық» жаға жайында 26 кәсіпкер, 104 нысан қызмет көрсетіп келеді. Сонымен бірге жаз бойы 100-ден аса ауыл тұрғындары осы жерде қызмет жасап, өз нәпақаларын табады. Қазіргі таңда көлдегі су деңгейінің түсуіне байланысты келіп демалушылар саны 2023 жылмен салыстырғанда төмен екен.
Тағы айта кетерлігі, көлдегі қауіпсіздік шаралары да басты назарда. жағажай басында кезекшілікпен Қызылорда облысы төтенше жағдайлар департаменті «Жедел құтқару жасағы» РММ-нің Қамыстыбас құтқару бөлімшесінің қызметкерлері жұмыс істейді.
Қамбаштың жағалауы жыл өткен сайын жаңданданып, жағажайдағы жабайы көріністер біртіндеп жойылып жатқанын көзіміз шалып жүр. Жеке кəсіпкерлер демалушылар үшін тынығу орындарын, үйлер көптеп салуда. Сонымен қатар, киіз үйлер де тігілген. Тіпті, арнайы келген қонақтар отыратын орындықтар мен жарық шамдары орнатылған. Сондай-ақ волейбол ойнайтын арнайы орын мен жабдықтары, көлді айнала серуендететін моторлы қайық та қамтылған.–Жыл сайын суға түсу маусымы басталғаннан-ақ отбасымызбен жаздың үш айында да Қамбаш көліне арнайы келіп демаламыз. Меніңше, күнделікті күйбең тіршлікте жүрген әр адамға ай сайын бір демалыс керек секілді. Сол секілді, міне біз де жаз басталса отбасылық дәстүр бойынша бірінші кезекте осы көлге келеміз. Мұнда толықтай дерлік жағдай жасалған десем де болады. Арнайы көл басынан үй жалдап, қалаған тағамымызға тапсырыс береміз. Балалар да бір демалып қалады,–дейді қала тұрғыны А.Орынбасар.
"Жұмыла көтерген жүк жеңіл" демекші, баршамыз осы кішігірім туризмді жалғыз аудан, облыс бойынша емес, әлем бойынша танытуға тырысқанымыз жөн. Қолда бар мүмкіндікті пайдаланғанымыз дұрыс секілді. Сол үшін одан әрі көркейтіп, дамытып халықтың әлеуметтік жағдайын көтеруге, жұмыссыздық мәселесін азайтуға, атсалысатындай етіп үйлестіру керек.
А. НҰРЛАНОВА
