ДДҰ: «Омикрон» коронавирустың соңғы штамы емес

Дүниежүзілік денсаулық сақтау ұйымы коронавирустық инфекция еш жерде жойылмағанын және әлі де үлкен қауіп төндіретінін еске салды, деп хабарлайды Egemen.kz.

ДДҰ COVID-19 пандемиясының аяқталуынан әлі алыс екенін және «Омикрон» коронавирустың соңғы қауіпті түрі деген қауесет жалған ақпарат екенін айтты.

Ұйымның мәліметінше, аптаның басында әлемде коронавирустық инфекцияның расталған жағдайларының саны 12,5 миллионға артты, бұл алдыңғы жеті күнге қарағанда миллионға көп.

«Пандемия әлі аяқталған жоқ. Біз оның эпицентрінде тұрмыз», деді ұйымның ресми өкілі Маргарет Харрис.

Сарапшылар әлемде аурудың жаңа өршуін бірқатар факторлармен байланыстырады.

Сарапшылардың пікірінше, әлемде індетке қарсы қорғаныс және шектеу шараларының жалпы төмендеуі өсу факторы болуы мүмкін.

Қосымша болжамдар жасай отырып, ДДҰ мамандары жаңа толқынмен күресу үшін вакцинацияны күшейтуді ұсынады.