Өзбекстан парламенті елдің 2025 жылға арналған бюджетін мақұлдады

Олий Мажилис Сенаты Өзбекстанның келер жылға арналған мемлекеттік бюджеті туралы заң жобасын мақұлдады, деп хабарлайды Kazinform агенттігінің меншікті тілшісі.

Парламенттің баспасөз қызметінен мәлім еткендей, шоғырландырылған бюджет кірісі 431 трлн сум (шамамен $33,4 млрд), шығыстар 480,5 трлн сум ($37,3 млрд) шамасында жоспарланған.

Бұл ретте мемлекеттік қазынаның кірісі - 308,5 трлн сум ($23,9 млрд), шығыстары - 344,8 трлн сум ($26,7 млрд) мөлшерінде болжанып отыр. Сонымен қатар, инфляция 7% деңгейінде болуы ықтимал.

Қабылданған заңда барлық шығындардың 52% әлеуметтік салаға бағытталатыны жазылған. Мәселен, медицинаға - 41,3 трлн сум ($3,2 млрд), ал экология мәселесін шешуге 3,6 трлн сум ($279 млн) бөлінеді.

Еске салайық, таяуда Өзбекстанның жалпы ішкі өнім көлемі алғаш рет $100 млрд асты.

Сурет: kaz.inform.kz

Бұған дейін хабарлағанымыздай, Өзбекстан 2030 жылға қарай жалпы ішкі өнім көлемін $200 млрд жеткізуді жоспарлап отыр.