Толқын Арал аудандық қоғамдық-саяси газет
» » Әл-Фараби және оның рухани мұрасы

Әл-Фараби және оның рухани мұрасы

Тарихты тұлғалар жасайды. Әл- Фараби, Абай секілді асылдарымызды бүкіл ұлт қазынасының абыройы деп ұғынуымыз керек. Осындай асылдарымыздың мерейтойын мемлекет деңгейінде ұлықтау мемлекетіміздің мерейтойы деп қабылдауымыз қажет. Мемлекет басшысының бастамасымен қолға алынған бұл игі бастаманың ұлт үшін берері орасан. Бүгінгі буын біздер-қазақтың байтақ тарихындағы қол бастаған көсемін, сөз бастаған шешенін білім мен ғылымын мәдениетін әлемге мойындатқан осындай дала данышпандарының тікелей мұрагері екенімізді сезініп мәңгілік мақтан етеміз.Әлемнің 70 -тен аса тілін меңгеріп, ғылымның тұтас тамырына негіз болған ойшылдың асыл мұрасын ғылым саласына бет бұрып қадам жасайтын әр буын ең алдымен оның тағылымын оқып-біліп үйренуі тиіс деген ойға қалдым. Ағылшын философы Френсис Бэкон : «Біз тарихтан кемеңгерлікті, поэзиядан шешендікті, математикадан зеректілікті, жаратылыс ғылымынан тереңдікті, адамгершілік философия сынан байыптылықты, логика мен көсемсөзден айтысу дағдысын үйренеміз»,- деп баға берген болатын. Бізге жеткен Әл – Фараби тағылымынан осындай тереңдік пен кемеңгерлікке толы ұлы мұраларынан тағылым аламыз.
Елбасының «Ұлы даланың жеті қыры » мақаласы негізінде бүгінде Отырар шаһары тарихи археологиялық ерекше қорғалатын тарихи аймақтар қатарына ілікті. Археологтардың тынымсыз ізденісі мен ғылыми жаңалықтарының негізінде бүгінде 24 мыңнан астам экспонат табылған. Оның кітапханасы дүние жүзіндегі кітапқа бай орын болып табылады. Әл- Фараби алғашқы білімін өз туған шаһарынан бастау алғаны заңдылық .
Кемеңгердің әрбір даналық сөздері тұтастай білім мен тәрбие, ғылым жолына негізделгендігі ерекше әсер қалдырады. Ұлы ойшылдың «Білімді болу деген сөздің мағынасы – белгісіз нәрсені ашуға қабілетті болу », «Ғылымды үйренем деген адамның ақыл ойы айқын, ерік жігері , тілек мақсаты ақиқат пен әділдік үшін талап жолында болуы шарт » деген ұлы насихаттарын оқисың, көңілге тоқисың . Ұлы бастаманы ұлықтау, дала данышпандары Әл- Фараби мен Абайдың мол мұрасын, азаматтық болмысын өз оқырманына насихаттап, рухани кемелденуіне жол ашу- баршамыздың ортақ парызымыз .Кітапхананың негізгі мақсаты осынау толымды үдерістің негізгі міндетінен шыға білу.
Шалманова Гүлнұр,
Орталық кітапхана қызметкері.
29 қаңтар 2020 ж. 715 0