Өміріміз өз қолымызда екенін ұмытпайық

Елдің елең-алаңы басылмай, қауіпті індетпен күресте күн-түн демей жұмыс жүріп жатқан қазіргі уақытта әрбір күннің бізге артар ауыртпалығы зор болып отыр. Қазір ақпарат ағыны желдей ескен заманда түске дейінгі жарияланған жаңалық түс қайта жаңа цифрлармен жаңарып отыр. Әрине бұл қуанатын емес, керісінше, бейқамдықты қойып, сақтық шараларын үдете түсуге себепші болуда. Міне, осы мәселелерге алаңдап, халық арасындағы бейқамдықты байқаған аудан әкімі М.Оразбаев әлеуметтік желі арқылы барша аудан жұртшылығына тағы да үндеу жариялады. Елдегі қызу тірлік пен сапырылысқан көлік нөпіріне алаңдаушылық білдірген аудан әкімі мұндай жауапсыздықтың соңы қылмыстық жауапкершілікке алып баратынын айтты. Өз сөзінде аудан басшысы:

– Сала мамандары барлық қоғамдық орындарда жаппай түсіндірме жұмыстарын жүргізіп келеді. Бұдан бөлек, бұқаралық ақпарат құралдары және дыбыс күшейткіш құралдары арқылы қаланың 6 жерінде қабылданған шаралар кеңінен насихатталуда. Дегенмен, аудан тұрғындарының бұл шектеулерге немқұрайлы қарайтыны алаңдатады. Мәселен, бүгінде бірқатар тұрғындар көшеде маскалық режимді сақтамауда. Такси қызметіне тыйым салынғанына қарамастан, бұл қызметті жалғастырушылар да толастамай отыр. Бұдан бөлек, қаулы бойынша жеке көліктер қозғалысына кешкі сағат 18:00-ден кейін шектеу қойылғанына қарамастан тәртіпті бұзушылар азаймай тұр, – деді.

Шындығында, қай кеселдің де адамзат баласына тигізген өз әсері болған. Тіпті қайғылы жағдайлардың орын алып жатқанын да естіп жатырмыз. Сол үшін бізге бірлескен істе бейқамдыққа баруға болмайды. «Денсаулық өзімдікі» деп жүре беру де еш қисынға келмейді. Себебі сіз өзіңізбен қоймай, өзгенің де өміріне қауіп төндіруіңіз мүмкін. Сондықтан қай істе болмасын тәртіпке бағыну қайырлы болмақ. Осыны ұғынсақ екен, ағайын!

А.Аманов,

қала тұрғыны.