ЖАУАПКЕРШІЛІК ӘРҚАЙСЫМЫЗДЫҢ МОЙНЫМЫЗДА

Жер-жаһанды тітіркендірген әлемдік пандемияның адамзатқа қауіп-қатері еш сейілген жоқ. Бұл ауыр дерт қай-қай елдің де әлеуетіне едәуір сын болып тұр. Қазақстан – дүниежүзі елдерінің арасында коронавирусқа қарсы шаралармен оның алдын алуға тырысқан мемлекеттердің бірі. Төтенше жағдайды дер кезінде жариялағандықтан да, елімізде аурудың есепсіз өршуінің алдын алды. Жан-жақты қорғану шаралары нәтижелі болған ауқымды жұмыстар істелді. Міне, күллі әлемді асау толқындай жосықсыз дүрліктіріп келе жатқан қара дерттің беті қайтқандықтан, елімізде таяуда ғана төтенше жағдай алынып тасталды. Жер-жердегі карантин де кезең-кезеңімен қысқара бастады. Алайда өңірімізде осы тұста қауіпті дерт аяқ асты өршіп кетті. Бұл – бәрімізді де алаңдататын жай болып отыр. Жергілікті жердегі тиісті органдар осыған байланысты карантиндік жағдайды қатайтып, қауіпсіздік шаралары жүргізіле бастады.
Жалпы коронавирус дертімен күресте нәтиже танытқан елдердің ең бірінші айтары – бұған халықтың өз жауапкершілігі. Әрбір адам саналы әрекеті арқылы аурудың етек жаюына жол бермейді. Бұл тұрғыда біздердің де өз жерлестеріміздің салғырттықты қойып, әрқайсысы өзінің, отбасының, айналасының амандығы, денсаулығы үшін қауіпсіздік ережелерін сақтауда әрдайым мұқияттық танытып отырғанын қалаймыз. Той-домалақ, құдалық, туған күн іспетті адамдар жиналатын шараларды кейінгі жақсы күнге ысырып қоя тұрған дұрыс.
Кейде әлеуметтік желілерде осы күресті күлкіге айналдырғандардың, аурудың аса қауіптілігін түсінбестен өзім білемдікпен жоққа шығарушылардың азаматтық санасының саяздығына ренжиміз.
Бір өңір, бір ел емес, әлемді өзінің жойқындығымен есеңгіретіп отырған осынау дерт біздің әрқайсымыздың отбасымыздың шырқын бұзбаса екен деп тілей отырып, жерлестерімізді сабырлыққа, тазалыққа, жауапкершілікке, санитарлық, денсаулық мекемелері қойған талаптарды мүлтіксіз орындауды сұраймыз.
«Денсаулық – зор байлық» деген халық даналығын ұмытпайық.
Ерғали Абдулла,
Қазақстан Журналистер одағының мүшесі