«Мәртебеде бол! МӘМС жүйесінде өз мәртебеңді анықта!»

Қызылордада «Мәртебеде бол! МӘМС жүйесінде өз мәртебеңді анықта!» акциясы өтті. Мақсаты – міндетті әлеуметтік медициналық сақтандыру және тегін медициналық көмектің кепілдік берілген көлемінің қағидаттары мен артықшылықтарын, пациенттердің құқықтары мен мүмкіндіктерін түсіндіру, МӘМС жүйесінде азаматтардың сақтандырылу мәртебесін өзектендіру.

«Қызылорда облысында МӘМС жүйесінде сақтандырылмаған 144 мыңнан астам азамат бар, бұл өңір халқының жалпы санының 20% - ы. Олардың басым бөлігі облыс орталығының, Қазалы ауданының және Байқоңыр қаласының тұрғындары. Негізінде біріңғай жиынтық төлем төлеушілері мен әр түрлі мекемеде жұмыс жасайтын жалдамалы жұмысшылар. Медициналық сақтандыру қорының міндеттері – барлық азаматтарды МӘМС жүйесімен қамту, халықты сапалы медициналық көмекпен қамтамасыз етуге жәрдемдесу», – деп атап өтті «Әлеуметтік медициналық сақтандыру қоры» КЕАҚ Қызылорда облысы бойынша филиалының халықты ақпараттандыру және өтініштерді қарау бөлімінің басшысы Абылайхан Рахымов.

Медициналық сақтандыру қоры филиалының мамандары №3 қалалық емханаға келушілерге МӘМС жүйесі туралы ақпараттық-материалдар, брошюралар, постерлер таратып, сұрақтарға жауап берді.

Атап айтқанда, тұрғындар МӘМС мәртебесін анықтау, қымбат медициналық қызмет алу, пациент ретінде өз құқықтарын қорғау сияқты мәселелерге қызығушылық танытты.