Ел болашағы – білімді жастар

Мемлекетіміздің жарқын болашағы білімді де білікті жастардың қолында. Жастар алдыңғы буын ағалардың жолын лайықты жалғастырып, өздерінің сенімді ізбасар екендігін дәлелдеуде. Бүгінде жастар қоғамның қозғаушы күші ретінде озық идеяларымен қаруланып, еліміздің дамып, өркендеуіне өз үлесін қосып келеді. Осы ретте Елбасымыз Нұрсұлтан Назарбаевтың: «Мен сіздер, бүгінгі жастар ерекше ұрпақ екендеріңізді қайталаудан жалықпаймын. Сіздер тәуелсіз Қазақстанда өмірге келдіңіздер және сонда ержетіп келесіздер. Сіздердің жастық шақтарыңыздың уақыты – біздің еліміздің көтерілу және гүлдену уақытты. Сіздер осы жетістіктер рухын және табысқа деген ұмтылушылықты бойларыңызға сіңірдіңдер», – деген сөзді мемлекет пен ұлт болашағы жастар болашағымен тікелей байланысты екендігін айқындайды.Қазіргі заман ағымына сай түрлі білім бағдарламалары аясында жаңа технологиялар да дамып келеді. Арамызда білімге құштар жастарымыздың да саны күн санап артып, олардың білімге деген талпынысы көңіл қуантады. Сонымен қатар білімдерін сынау мақсатында елімізде көптеген түрлі сайыстар жиі ұйымдастырылады. Мұндай сайыстардың мақсаты – оқушының шынайы білімін көрсету, шыңдалу.
Жақында аудан әкімі Мұхтар Оразбаев ҚР Тұңғыш Президенті – Елбасы Н.Ә.Назарбаевтың бастамасымен дарынды балалар мен жастарды қолдауға бағытталған “Ел Үміті” атты бағдарламасы аясында жобаға аудан атынан қатысып, жоғары нәтиже көрсеткен, "Елбасы медалі" иегері атанған 14 оқушыны арнайы қабылдаған болатын.
Міне, сол марапат биігінен көрінген жастардың бірі, өз білімімен дараланған қаладағы №62 мектеп-лицейінің 11 сынып оқушысы – Жанерке Алмасбекқызы Қалиева. Сонымен бірге Жанерке Қалиева “Алтын белгіге” үміткер және көптеген білім сайыстарына қатысып, жүлделі орындардан көрініп жүрген білімді шәкірт. Атап айтсақ, "Конкурстар. Конференциялар. Олимпиадалар" байқауының “Қазақстан тарихы” пәнінен І дәрежелі жеңімпазы, республикалық “Жас ғалым-2017” байқауында ІІ орын және де аудандық жарыстардан да жүлделі орындарды иеленіп, мектеп, аудан мерейін асырып келеді.
Болашақта тек білімді ел ғана қандайда болмасын бәсекелестікке төтеп бере алып, өзін-өзі сақтап қалатыны сөзсіз. «Ел болашағы – білімді ұрпақта». Әрбір мемлекеттің болашағы мектебінде шыңдалады. Оқушы мектеп табалдырығында жүріп, ұстаз берген білімді бойына сіңіреді, содан нәтиже шығарады. Сапалы білім, саналы тәрбие беру әр ұстаздың алға қойған міндеті болса, өз ісінің білімді, өнегелі азаматы болу – әр оқушының парызы. Осындай білімді оқушыларымыз ұстаз, ата-ана үмітін ақтап, аудан мәртебесін асқақтатып жүргені қуантады. Бүгінгі білімді оқушы – ертеңгі еліміздің жарқын болашағы боларына сенім мол.
Зәуреш ОРЕКЕШОВА,
№62 мектеп-лицейінің мұғалімі