Тұрмыстық зорлық-зомбылыққа жол бермеу маңызды

Бүгінде барша әлем елдерінде белең алған тұрмыстық заң бұзушылық біздің елімізде де өзекті мәселелердің бірі болып келеді. Зерттеулер бойынша оның басты себептерінің біріне етек алған маскүнемдік, жұмыссыздық, әлеуметтік жағдайдың төмендігі және қызғаныш сипатындағы түсініспеушілік сынды жайлар жатады. Тұрмыста жапа шегетіндер негізінен әйел адамдар.Ал, біздің мемлекетіміз үшін әйел ананы қорғау ерекше мәселе. Бұған Елбасымыздың өзі тереңірек мән беріп, «Қоғамның өркениеттік деңгейі оның әйелдерге деген қарым-қатынасымен өлшенеді» деп тұжырымдаған. Расында әрбір әйел отбасының ұйытқысы. Өкінішке орай, қазіргі уақытта қоғамның қарыштап дамуына қарамастан әйелдерге қатысты отбасылық зорлық-зомбылық әрекеттер тыйылар емес. Оған айғақ отбасы-тұрмыстық қарым-қатынастағы әйелдерге сыйламаушылық көрсетіп, былапыт сөйлеу, қорлап тиісу, кемсіту және ұрып-соғу және олардың тыныштығын бұзатын басқа да әрекеттерге қатысты әкімшілік құқық бұзушылық істер санының азаймауы. Мәселен жыл басыннан бері аудан көлемінде отбасы тұрмыстық қатынас аясында әйел адамға қатысты жасалған құқық бұзушылықтың 58 дерегі тіркелді.

Иә, қазіргі қоғамның басты дертіне айналған бұл мәселемен жалғыз құқық қорғау қызметкерлері ғана емес жалпы қоғам болып күресу маңызды. Отбасын саналы түрде құрған ересек адамдар отбасы алдындағы жауапкершілікті сезініп тұрмыстық зорлық зомбылыққа жол бермеу өз қолдарында екенін ұмытпағандары жөн!
Егер де Сіз отбасындағы зорлық-зомбылыққа душар болсаңыз үнсіз қалмаңыз! Сіздер үшін арнайы сенім телефоны тәулік бойы кез-келген нөмірден тегін жұмыс жасайды. Сенім телефоны: «102» арнасы немесе 2-22-02.
Гүлжанат Қуанышбаева,
Арал АПБ ЖПҚб ӘЗЗҚ тобының инспекторы, полиция аға лейтенанты