Медиация ерлі-зайыптыларды татуластырып, отбасын сақтап қалды

Азаматша К. Арал аудандық сотына талап арызбен жүгініп, жауапкер С-мен заңды некеде тұратынын, жауапкермен мінездерінің жараспауына байланысты келешек бірге тұрудың мүмкін еместігін көрсетіп, араларындағы некені бұзуды сұраған.

Сол секілді, азаматша М. жауапкер Е-мен дәм-тұзы жараспауынан отбасын сақтау мүмкін еместігін көрсетіп, некелерін бұзуды сұраған.

Дауды бейбіт жолмен шешудің тиімділігі, отбасылық құндылықтардың маңыздылығы, толық емес отбасында өскен баланың келешегі туралы татуластырушы-судья С.Бертаймен жүргізілген түсіндіру жұмыстарының нәтижесінде, ерлі-зайыптылар талап арыз соттың іс жүргізуіне қабылданбай тұрып, дауды медиация тәртібімен реттеуге ниет білдірген.

Сот ұйғарымдарымен ерлі-зайыптылардың отбасын сақтап қалу жөнінде жасасқан медиативтік келісімдері бекітіліп, іс жүргізу өндірістен тоқтатылды. Төленген мемлекеттік баж алымдары талап қоюшыларға қайтарылды.