Аудан әкімі дария бойындағы жағдайды бақылады
Аудан әкімі Серік Сермағамбетов жұмыс сапарымен Аманөткел ауылдық округінде болды. Қазіргі таңда күннің суытуына байланысты Сырдария өзенінің бойында мұз ұстасуда. Осыған орай, аудан әкімі «Ақшатау-Қамыстыбас» көлдер жүйесін суландыру мақсатында салынған «Аспай» суағытқысының және Бұрмақұлақ арнасының жағдайын бақылады. Аталған аймақтарда дария суы қалыпты деңгейде. Дария бойындағы жағдайды көрген соң аудан басшысы жауапты мамандарға сол маңдағы каналдардың шлюз ағытқылары қысқы мезгілде ашып-жабылуы қиындық тудырмас үшін қажетті жұмыстар жасауд жүктеді. Сондай-ақ, алдағы уақытта дариядан су көп мөлшерде келген жағдайда бөгеттерді жарып өту қаупін болдырмас үшін алдын алу шараларын үйлестіруді, арнайы техникалардың дайындығын әзірлеуді тапсырды.Бұдан бөлек ауылдық округ әкіміне «Хан» қалқымалы көпірінің жағдайын қадағалауды және «Бұрмақұлақ» арнасымен «Аспай» су ағытқысындағы су деңгейі мен бөгелген аймақтардың жағдайын арнайы кезекшілік ұйымдастыру арқылы күнделікті бақылауда ұстау қажеттігін айтты.
Мұнан кейін аудан басшысы Аманөткел ауылдық округінде «Ауыл - ел бесігі» жобасы аясында салынып жатқан денешынықтыру және сауықтыру кешенінің құрылысымен танысты. Құрылыс алаңында мердігер мекеме өкілі биылғы жылы атқарылатын жұмыстардың барысын түсіндіріп өтті. Қазіргі таңда нысанның іргетасы құйылып біткен, жылу қазандығының құрылысы аяқталған. Қабырғаларын тұрғызуға дайындық шаралары жасалуда. Құрылыс жұмыстарын «Нұр- техсервис» ЖШС жүргізуде. Аудан әкімі мердігер мекеме өкіліне барлық жұмыстардың сапалы әрі тиянақты жүргізілуін қадағалауды тапсырды.
