Балық неден қырылды?
Жуырда Арал ауданындағы Бөген ауылдық округіне қарасты Қарашалаң су айдыны аумағындағы Сағынбай каналында балық шабақтарының қырылу фактісі белгілі болды. Осыған байланысты БАҚ өкілдері үшін баспасөз конференциясын өткізген мамандар бұл оттегінің аздығынан болған деген болжам айтып отыр.Арал-Сырдария облысаралық бассейндік балық шаруашылығы инспекциясы басшысының міндетін атқарушы Жанқожа Сапаровтың айтуынша, инспекция тарапынан арнайы топ құрылып, зерделеу жұмыстары барысында ұзындығы 1,2 шақырым, ені 16 метр болатын канал бойынан бірнеше ойық жасалып, судағы оттегі мөлшері 3,5 мг/дм³, температура 2,5ºС екендігі анықталған.
Осы күні балықты сақтап қалу үшін қолдан оттегі беру жұмыстары қолға алынды. Оттегі жетіспеушілігінен бөлек балықтың қырылуына судың аздығы, екі каналдың ортасының бөлініп қалуы, мұздың қалыңдығы да әсер еткен.
– Арал орман және жануарлар дүниесін қорғау жөніндегі мемлекеттік мекемесі қызметкерлері Сағынбай каналында 25 ойық жасап, мұз шұңқырларына қамыс салынды, – деді Өңірлік коммуникациялар қызметінде өткен баспасөз конференциясында облыстық табиғи ресурстар және табиғат пайдалануды реттеу басқармасы басшысының міндетін атқарушы Айдос Аяғанов.
Тиісті орын өкілдері балықтан және судан алған сынама бойынша сараптама жұмыстарын бастап кетті.
Мұрат ЖЕТПІСБАЕВ,
Қызылорда облысы
egemen.kz
