Президент айтқан Конституцияға енетін өзгерістер бойынша референдум өтетіні туралы жаңалықты ықыластана тыңдадық. Қасым-Жомарт Тоқаев референдумның әрбір азаматқа ел тағдырын анықтау ісіне қатысуға мүмкіндік беріп, демократияға бет алуына ықпал ететіндігін айта келе, Констиуцияның жаңаруы іргелі си­патқа ие екенін және ол елдің ­сая­­си­ жүйесін түбегейлі өзгерте­тінін атап өтті. Сонымен бірге осы шешім қабылдау үрдісіне халық­тың өзі белсеніп қатысуы керек­тігінің маңыз­ды­лығына нақты тоқтал­ып, референдумның қоғамды жан-жақты демокра­тия­ландыруға және Жаңа Қазақ­станды құруға мүмкіндік беретінін, яғни төте демократияның даңғыл жолы осы екендігін халыққа жеткізді.Соңғы рет референдумның елімізде бұдан 17 жыл бұрын өткені есте. Ол тұстағы Қазақстандағы саяси парадигма мүлде басқа еді. Ендігі жерде конституцияға енетін өзгерістер жаңа саяси реформалардың бастауы болмақ. Деген­мен де біз атап айтқанда, Ата Заңға енгізілетін жа­ңа­шылдықтардың арқасында халық пен биліктің арасы жа­қын­дай түсіп, өзара диалог орнайды деп сенеміз. Бұл – халықтың жағдайының жақсарып, тұрмысының түзелуі үшін  де зор мүмкіндік.
Алдағы референдум – мемлекетімізді жетіл­ді­руді, жаңғыртуды және нығайтуды көз­дей­ді. Сондықтан халық осы мүмкіндікті құр жібермей, 5 маусым күні дауыс беруге қа­тысуы тиіс. Референдум нәти­жесі ха­лық шешімі болмақ. Сонысымен де ол ел тари­хында лайықты орын алары даусыз. Ха­лықтың таңдауы ең жоғарғы заң­дық күш­ке ие болады. Ел қолдаса, Қазақ­стан­ның жаңар­ған Ата Заңы өмірге жолда­ма алады. Сол себепті өз қалауымызды таңдау үшін алда өтетін референдумға белсенді қатысайық дегім келеді. Біз қазіргі уақытта үлкен реформалардың табалдырығында тұрмыз. Мемлекет басшысына қолдау көрсетіп, Ата Заңға заманға сай өзгеріс енгізу – кезек күттірмес жауапты іс. Конституцияны өзгерту – Жаңа Қазақстанның ең бірінші қадамы.

ЖАСҰЛАН АЙТЖАНОВ,
Ж.Әбдірашев атындағы №62 мектеп-лицейінің директоры