Еліміздің бірқатар облысында үсік жүреді

«Қазгидромет» РМК дүйсенбіге арналған ауа райы болжамын жариялады, деп хабарлайды Egemen.kz.

«Еліміздің солтүстігінде, шығысында және оңтүстік-шығысында ғана циклондық белсенділіктің және атмосфералық фронттардың үстемдігі сақталады, олармен бірге жаңбыр жауады, шығыста, оңтүстік-шығыста қатты жаңбыр жауып, найзағай ойнайды. Түнде Алматы облысының таулы аймақтарында қатты жауын-шашын (жаңбыр, көктайғаққа ауысады) күтіледі», делінген «Қазгидромет» РМК хабарламасында.

Республика бойынша жел секундына 15-23 метрге дейін күшейеді, еліміздің шығысында, оңтүстік-шығысында екпіні секундына 23-28 метрге дейін күшейеді, күндіз Маңғыстау облысында шаңды дауыл соғады. Қазақстан Республикасының солтүстігінде, солтүстік-батысында түнде және таңертең тұман түседі. Күндіз Жамбыл облысының таулы аймақтарында бұршақ жаууы мүмкін.

Қызылорда, Түркістан, Жетісу облыстарының басым бөлігінде, оңтүстігінде, шығыс-солтүстігінде, Абай ауданының орталығында, Шығыс Қазақстан облысының солтүстік-шығысында, Атырау облысының батысында, сондай-ақ Қостанай облысының оңтүстігінде төтенше өрт қаупі сақталады.

Түнде Ақмола облысының солтүстік-батысында, Солтүстік Қазақстан облысының солтүстік-шығысында, Қостанай, Батыс Қазақстан, Ақтөбе облыстарының солтүстігінде 1-3 градус үсік түседі.