Ақжал толқын жағаға ұрған, осы тұста қала болған

... Ертегі секілді. Алайда тарихтың қатпарлы тұстарына үңілсек бір замандары солай болғанын көреміз...- Той құтты болсын,
- Айдынымыз толсын,
- Елдің несібесіне айналған балығымыз молайсын,-деп өзара күбірлескен анау маңдағы көнекөздер адам қарасы қалың шараны бағытқа алып аяңдап келеді. Енді бірі ұзын мойын крандарға қолын көлегейлеп зер сала, осынау порттың орнында кісі айтса нанғысыз еңбек көрігінің қызғанын есіне алып, бас шайқайды.
Ел қуаныш құшағында. Теңіз төскейінде көрніс тапқан дүбірлі той бүгін ғана емес, Қазан айының басында бастау алғаны баршаға мәлім. Дегенмен , дәл қазіргі жиналудың орны ерекше еді.Яғни , аралдықтардың мазмұны бөлек бастамасына куә болған облыс әкімі Нұрлыбек Мәшбекұлы Нәлібаев та осы жерде. Ал, қараша халық аймақ басшысының елдің ортасында жүргенін жақсылықтың нышанына балайды.

Бұрынғы бассейннің орны дәл қазір басқаша сипатқа енген. Тындырымды іс, жемісті жұмыс жасалған. Бір замандарда Паволжье тұрғындарын аштық құрсауынан құтқарған балықшылардың өлшеусіз еңбегін паш еткендей сол уақыттарда су маржанын сүзген қауымның аты-жөні таспен қашалып жазылған. Ұрпақтары аталарының есімінің тұсын сипап, іштей мақтанатындай. Еңселі ескерткіште сол қысылтаяң шақта Ленин жазған хатқа жауап ретінде 14 вагон балық жөнелткен теңіз тарландарының құрметі үшін тұрғызылған. Жанында суға сүңгіген қос балық ағыста еркелей шоршып жатқандай.
Облыс әкімі жанкешті еңбектің нағыз үлгісін бейнелеген ескерткіштің ашылу салтанатында Арал балықшыларының ерлікке толы ғибратты ғұмыры ұрпақтан ұрпаққа аңыз болып аңыз боп қала беретінін баяндап, жағалау жұртының әркез амандығын тіледі.

Мұнан соң аймақ басшысы қызыл вагонға қап-қап балық артқан балықшылардың қайырлы ісі айна-қатесіз сахналанғанын құрметті меймандармен бірге тамашалап, артынша дәстүрлі Арал балықшыларының Vl слетінде бір топ сала үздіктерін марапаттады. Сондай-ақ, Қызылорда қаласының және Арал ауданының құрметті азаматы, қоғам қайраткері Құдайберген Саржановқа Мемлекет басшысының Алғыс хатын табыстап, иығына шапан жапты.
Көрдік, көп нәрсені көңілге түйдік. Аралдың кешегісі мен бүгіні осылайша қаланың 95 жылдығымен ұштасып тағы бір мәрте көптің жадында жаңғырды.
Аралдың табанынан су кеткенмен, халқының жүрегінен жыр кетпегені дәлелденді. Өйткені, бұл - Арал.