Дерттің алдын алу маңызды

Облыс көлемінде онкологиялық аурулардың асқыну жағдайларын талдау, алдын алу бойынша арнайы жұмысшы тобы құрылған болатын. Онкологиялық қызметті ұйымдастыру, әдістемелік көмек көрсету үшін құрылған топ құрамында облыстық денсаулық сақтау басқармасы мен облыстық онкология орталығының мамандары бар.

Жұмысшы топ Арал ауданаралық ауруханасында болып, мониторинг жүргізді. Жұмыс барысында аурухана қызметкерлерімен кездесу өткізіп, аталған мәселе бойынша пікір алмасты. Жиынға аудан әкімінің орынбасары К. Бержанов қатысып, тұрғындар денсаулығын сақтаудың маңыздылығын айтып, басты байлық мәселесі әрдайым басты назарда екендігін жеткізді.

Одан соң ауданаралық аурухананың бас дәрігері М. Ршымбетов аудандағы онкологиялық қызмет бойынша атқарылған жұмыстарды баяндады. Жыл басынан бері аудандағы 1310 адам онколог дәрігердің қабылдауында болса 82 науқас облыстық онкология орталығында ем алған.

Жиыннан соң жұмысшы топ мүшелері аудандағы аурухана, емханаларды аралап ем жүргізу шараларының барысымен танысты.