Ірі мөлшерде алаяқтық жасағаны үшін бас бостандығынан айырылды

Арал аудандық сотында Қазақстан Республикасының Қылмыстық Кодексінің 190-бабы 3-бөлігі 4)тармағымен айыпталған С-ның қылмыстық ісі қаралып, айыптау үкімі шығарылды.

Сотталушы С. сот үкімімен төмендегідей қылмыс жасағаны үшін айыпты деп танылған. Атап айтқанда ол, бұрын бірнеше рет алаяқтық қылмысы үшін сотты бола отырып, бөтеннің мүлкін алдау жолымен иемденіп, бірнеше жәбірленушілерді алдап, таныстары арқылы оларды жұмысқа орналастырып беремін деп сеніміне кіріп, алаяқтық жолмен ірі мөлшерде ақша иемденген.

Сотталушының қылмыстық әрекеті өзінің әркелкі жауаптарымен, сондай-ақ, жәбірленушілер мен куәлардың жауаптарымен, аудиожазбалармен, аударым түбіртектерімен және іс бойынша басқа да дәлелдемелер жиынтығымен дәлелденген.

Қылмыстық заңнамаға сәйкес бұл қылмыстық әрекеттер ауыр қылмыстар санатына жатады.

Сот үкімімен С. ҚК-нің 190-бабы 3-бөлігі 4) тармағымен кінәлі деп танылып, түпкілікті 4 жыл мерзімге бас бостандығынан айыру жазасы тағайындалды. Қылмыспен келтірілген шығындар жәбірленушілер пайдасына өндірілген.

Сот үкімі заңды күшіне енген жоқ.

Арал аудандық соты