56 жыл соққан сағат
Иә, қазір қоғам өзгерді. Соның пайдасы болар, жанымыз нені қаласа, қолымыз соған жетеді. Көз көріп жүргендей тіпті тіршіліктің барлығын технологияның тың дүниелері ауыстырып, батырма арқылы басқаратын уақытқа жеттік. Саусақпен басқарылатын бұл әлемді ешкім жамандай қоймас. Бірақ, "Оның сапасы мен жарамдылығы қаншалықты деңгейде? Шыдамдылығы қандай?" деген сұрақ туындайды. Бірақ бұл сұраққа алаңдап жатқан да біз жоқпыз. Себебі бірі істен шықса, су жаңасын ала қоямыз. Бұл – ақиқат.Ал менің айтар мына бір ақиқатыма бәлкім сенбеулеріңіз де мүмкін. Себебі жарты ғасырдан астам уақыт бойы тоқтаусыз "жүрегі соғып тұрған" сағат жайында естігенде біздің де сенгіміз келмеді. Алайда дәл солай болып шықты. Бүгінде біз әңгіме етіп отырған қол сағатты сағаттың иесінің келіні қолынан тастамай тағып жүр. Бұл сағаттың тарихы жайлы да сол келіні Ақгүл Жақсылықова айтып берген болатын.
– Марқұм енем көзі тірісінде осы сағат жайында сөз ететін. Олай айтуына да себеп бар. Үстіміздегі баспанамыз жайлы сөз қозғала қалса "Әкелерің маған алтын сағат сыйлаған еді. Сол сағатты осы үйді салып жатқанда жоғалтып алғанмын. Төбе жапқанда ма, әлде қабырғасын өргенде ме, есімде жоқ, әйтеуір сағатты таппай қалдым" дейтін. Сол сағатта арада 56 жыл өткенде тауып алдық, – дейді.
Иә, жаңа баспана тұрғызбақ ниетте қазіргі баспанасын бұзған уақытта дәл сол сағат табылады. Бір қызығы, сол 56 жыл бұрын табылмай кеткен қолсағаттың тілі әлі күнге дейін тоқтамаған.
Міне, осындай да қызықты жолықтыруға болады. Бастысы өнім шығарушылар сапаны ойласа болды. Біз ел естімеген дүниелерді естуге, жазуға дайынбыз.
О. ЖОЛДАСОВ
