Наурыз сыры: Өткен мен болашақтың тоғысуы

Көктемнің лебі ескен, Жер-ана жасарып, тұмса табиғат бусанып, табиғат жаңғырып, тұрмыс-тіршіліктің мән-мағынасын ұғынған дана халқымыз Әз-Наурызды айрықша салтанатпен қарсы алып, жаңару мен жасампаздықтың бастауы, ырыc пен берекенің арқауы деп бағалаған. Наурызнама онкүндігі аясында Аралда облыс әкімі Нұрлыбек Нәлібаевтың қатысуымен «Армысың, әз Наурыз!» атты мерекелік шара өтті. Оған Парламент сенаты мен Мәжілісінің депутаттары Руслан Рүстемов, Мұрат Әбенов, Мархабат Жайымбетов, Мұрат Ергешбаев және зиялы қауым өкілдері мен ел ағалары, аудан тұрғындары қатысты. Орталық алаң Ұлыстың ұлы күніне сай безендірілген. Жиналған жұртшылық қолөнер туындылары және тарихи жәдігер қойылған көрмелерді, ұлттық ойындарды, қыз бен жігіт айтысын тамашалады. Аймақ басшысы тұрғындарды Наурыз мерекесімен құттықтап, атқарылған жұмыстарға тоқталды.

Президентіміздің, Үкіметтің ерекше қолдауымен жүзеге асқан Сыр өңіріндегі байыпты бастамалар мен жасампаз жобалардың маңызы зор. Былтыр осыдан екі жарым жыл бұрын 364 млрд теңге болған облыс бюджетін 750 млрд теңгеден асырдық. Бұл ауқымды қаражат аймақтағы ең өзекті деген мәселелерді шешуге, тұрғындардың өмір сүру сапасын жақсартуға және ауқымды инфрақұрылымдық жобаларды іске асыруға бағытталды. Сәулеті мен сәні келіскен жаңа ғимараттар бой көтеріп, ел игілігіне табысталды. Жергілікті кәсіпкерлер, осы елден шыққан меценаттар, туған жерін түлетіп, көркейтуге бар күш-жігерін салып, демеушілік көрсетті, белсенділік танытты. Алдағы уақытта да бекем бірлігіміз бен тату тірлігіміздің арқасында өңіріміздің экономикасын тұрақты дамытатын, елдің игілігі мен балаларымыздың болашағы үшін жасалатын ауқымды жобалар жалғасын табады. Ұлттық құндылықтарымызды ұлықтаған Наурыз мейрамы тәуелсіз елімізге, туған жерімізге толайым табыстарымен, жаңалықтарымен келсін! Жеріміздің тынысы кең, еліміздің мерейі үстем, халқымыздың келешегі кемел болсын деп тілеймін! – деді Н.Нәлібаев.

Мерекелік шарада «Жұмысшы мамандықтар жылына» орай, Арал қаласының әлеуметтік-экономикалық дамуына қосқан үлесі үшін бірқатар азамат облыс әкімінің Алғыс хатымен марапатталды. Парламент Мәжілісінің депутаты Мұрат Әбенов құттықтау лебізін жеткізіп, Қызылорда облысының құрметті азаматы, Биғали Қаюпов батасын берді.

Ынтымақ күнініңидеясы – жалпы халық бір-біріне деген сый-құрметтерін арттырып, татулық пен бірлікті насихаттау болып табылады. Бұл күнгі шаралар арнайы атау берілген киіз үйлерде өтті. «Ұлыс» үйінде «Құрсақ шашу» дәстүрінің қойылымы және «Наурыз – құт-береке бастауы» кітап көрмесінің таныстырылымы болса, «Табиғат» үйінде «Ұлттық өнер – ұлт мұрасы қолөнер бұйымдарының жасалуы бойынша шеберлік сағаты өтті.

«Руханият» үйінде «Жас жыршылар керуені» салтанат құрса, «Салтанат» үйінде  «Ұлттық құндылықтар тәрбиенің түп қазығы» шаш өру, шашбау тағу, шаш қап дайындау бойынша шеберлік сағаттары болды. «Толағай» үйінде Ұлттық спорт түрлері - қазақ күресі, асық ату, садақ ату, бес асық, тоғызқұмалақ ойындарынан сайыс, «Жас өркен» үйінде «Шаңырақ көтеру», «Босаға майлау» ұлттық салт-дәстүрлерінен қойылым болды.

«Бірлік» үйінде «Қыз алып қашу» дәстүрінің қойылымы көрсетілсе, «Қара шаңырақта» Мұражай және архив заттарының таныстырылымы өтті. «Мейірім» үйінде жергілікті өнімдер көрмесі, «Еңбек» үйінде «Жұмысшы мамандықтары - табысты өмірдің кепілі!» атты жұмысшы мамандықтарды насихаттау шарасы, «Жеңіс» үйінде Ұлы Отан соғысына қатысты құжаттар мен экспонаттардың таныстырылымы және «Шаттық» үйінде «Ұлттық құндылық – ұлт қазынасы» ұлттық тағамдар бойынша шеберлік сағаты болды. Ал «Аралтұз» үйі «Адал еңбек – адал табыс» және «Аралтұз» АҚ өнімдерінің көрмесін өткізсе, «Көкарал» үйінде «Тана бау тағу» салт-дәстүрінің қойылымы көрсетілді.

21 наурыз – Ынтымақ күнінде өткен мазмұнды шаралар легін кешкілік аудандық мәдениет үйінің жанынан құрылған «Арал» вокалды-аспаптық ансамблі жанды дауыста ән шырқап, мерекелік концертімен түйіндеді.

Нұрай ӘМІРХАНОВА