Аудандағы ауыз судың сапасы
Су – топыраққа нәр, ауаға ылғал беретін жаратылыс әлеміне жан бітіретін тіршіліктің өзегі. Халқымыз «Таза су- тірі қан, тамшы су- түйір нан» дейді. Адам күніне 2-3литр суды пайдаланатын болса, күннің ыстығында 2 есе көп ішеді. Су ағзадағы бүкіл тіршілік әрекетін реттеп отырады. Ол газ тәрізді, сұйық және қатты заттарды ерітуші болып табылады, сондай-ақ зат алмасу, ас қорыту жүйелерінің жұмысына қатысады.Сапалы ауыз су мөлдір, иіссіз және жағымды дәмді болуы керек. Сапасыз судың салдарынан адамдар холера, гепатит, дизентерия т.б жұқпалы аурулармен жиі ауырады. Арал ауданында ауыз су жер асты су көздерінен алынады. Жер асты су көздерінен жер үсті су көздерінен айырмашылығы сырттан судың ластануына жол берілмейді, әрі құрамы мен температурасы бірқалыпты болады. Арал халқы үшін ауыз судың маңызы өте зор. Ауыз судың сапасын қадағалап адам организміне зиянын болдырмау мақсатында Арал аудандық санитариялық-эпидемиологиялық бақылау басқармасы нормативтік құжаттарды басшылыққа алып, жұмыс жасауда. Арал ауданы халқының 93,6 пайызы орталықтандырылған ауыз су жүйесімен, 5,7 пайызы орталықтандырылмаған ауыз су жүйесімен, 0,7 пайызы тасымалды жолмен қамтамасыз етілген. Ауданымызды орталықтандырылған ауыз сумен қамтамасыз ету қызметін «Арал-Сарыбұлақ топтық су құбыры» өндірістік бөлімшесі атқарады. Кәсіпорын өз алдына бөлек ведомстволық зертханамен жабдықталғандықтан халық тұтынып отырған ауыз судың сапасына күнделікті қадағалау жүргізіп отырады. Сонымен қатар санитариялық-эпидемиологиялық бақылау басқармасымен аудан көлемінде 2025жылдың 1-тоқсанында орталықтандырылған ауыз су нысандарынан жоспарлы тексеру кезінде және ай сайынға ауыз су сапасына жүргізілген мониторинг нәтижесімен микробиологиялық және санитариялық-химиялық көрсеткіштерге барлығы 33 сынама, орталықтандырылмаған ауыз су нысандарынан 5 сынама алынып, нәтижесімен сәйкессіздік анықталмады.
Ауданымыздағы орталықтандырылған ауыз су жүйелеріне 2025 жылдың көктемгікүшейтілген хлормен залалсыздандыру жұмыстары сәуір айына жоспарлануда. Басқарма тарапынан аудан тұрғындарының сапалы ауыз сумен қамтамасыз етілуіне, ауыз су арқылы тарайтын жұқпалы аурулардың алдын алу мақсатында іс-шаралар жүргізуі жалғасын таба береді.
Ауру астан дейді дана халқымыз, ал астың бәрі судан нәр алатындығын ұмытпайық, ағайын.
А. САТЕКЕЕВА,
Арал аудандық санитариялық-эпидемиологиялық бақылау
басқармасының басшысы
Фото: Нұрболат Нұржаубай
