«Қызылорда-Ақтөбе» бағыты ашылады

Сырдария өзенінің сол жағалауында құрылыс қарқын алған. Былтыр онда жаңадан автовокзал салынып, ел игілігіне берілген болатын. Сапаржай «Батыс Еуропа – Батыс Қытай» халықаралық күрежолына жақын орналасқандықтан, автобустар қала ішіне кірмейді. Тиімді тұсы да осы. Бүгінде қаншама жолаушы діттеген жеріне жетуде. Осы орайда қала әкімдігінің ұйымдастыруымен пресс тур өтті.

Ғимарат заман талабына сай. Ай­наласы абаттандыры­лып, жо­лау­­шылар үшін барлық жағ­дай қа­рас­­тырылған. Нысан екі қабатты. Бірінші қабатта күтушілер залы, касса, ана мен бала бөлмесі, жүк сақтау камералары, лифт болса, екінші қабатында меди­циналық қызмет көрсету, жүргізу­шілердің тынығу бөлмесі мен асхана бар.

Мүмкіндігі шектеулі азаматтарға да жағдай жасалған. Автобустар мен жолаушы тасымалы, қызметі жайында «Автобус паркі» ЖШС ди­ректорының автовокзал бойынша орынбасары Жансұлтан Елшекенов айтып берді.

– Автовокзалдан күніне «Қызыл­орда-Ташкент» халықаралық рейсі, облысаралық Астана, Қарағанды, Жезқазған, Алматы, Әйтей, Сары­ағаш бағыттарына автобустар қаты­найды.

Сондай-ақ ауданаралық ба­­ғыт бойынша Арал, Қазалы, Бек­арыс­­тан би, Төретам, Жосалыға күн­делікті маршрут жүреді. Ны­сан тәулігіне 200 жолаушыны қабыл­дайды. Автобустар соңғы үлгіде жаб­дықталған. Рейстер көбіне түстен ке­йін ұйымдастырылған. Билет ба­ға­сы тиімді.

Мәселен, Ташкентке бару үшін билет құны 4500 теңге, себебі, жолаушыларды үйрету үшін ең төменгі тарифті ұсынып отырмыз. Келушілерге 7 кассир қызмет көр­сетеді. Сұраныс артса, санын көбей­туге мүмкіндік бар. Билет онлайн да, касса арқылы да сатылады. Бұ­дан бөлек, теміржол вокзалынан да қосымша пунк аштық. Себебі, по­йыздан түскен жолаушылар сол жерден автобустарға отырады. Тағы бір жаңалық осы айдың ортасында «Қызылорда-Ақтөбе» рейсі ашы­лады, – дейді ол.

Қазір автовокзалда 15 адам ең­бек етеді. Ғимарат пен аумағының қауіпсіздігіне «Ер-Нұр» ЖШС жа­уапты. Қоғамдық көлік мәселесі де шешімін тапқан. Мұнда 25, 16 нөмірлі маршруттар қатынайды. Сондай-ақ экотакси қызмет көрсетеді.

– Адамдар енді үйренісіп ке­ле­ді. Бастапқыда шет аймақта ор­на­­­ласқанын алға тартатын. Мар­шрут­­тар уақытылы жүргеннен ке­­­­йін келе бастады.

Арнайы байла­ныс телефондарына күндіз-түні ха­бар­­­­ласады, қызмет сапасы жақсарды. Би­леттер 3-4 күн бұрын өтіп кетуде. Астана, Алматы бағытына жатын ор­ны бар автобустар шығады.

Бұл халық үшін өте тиімді. Әсіресе, үл­кен кісілер мен балаларға, ана­ларға ыңғайлы. Алдағы уақытта жо­­лаушылар саны артып жатса, жеке кәсіпкерлермен келісіп, биле­тін ұйымдастырып берсек, олар қо­сым­ша автобустар шығаратын бо­лады, – дейді ол.

Сондай-ақ басқа облыстық тасы­мал­даушылар «Салтанат» автовок­залынан облысаралық Шымкент, Түр­кістан және ауданаралық Шиелі, Жаңақорған маршруттары тұрақты жүреді. Ал ескі базар аумағынан ау­данаралық Жалағаш және ауыл­дарына арнайы автобустар шығады.

Мемлекет басшысы Қасым-Жомарт Тоқаевтың халыққа арнал­ған Жолдауында «Көлік-логистика саласы экономикамызды алға бас­тайтын басты күштің біріне айналуға тиіс» деген болатын.

Жолаушылар мен жүк тасымалын ұлғайту мақса­тында салынған автовокзал бүгінде алыс пен жақынды байланыстырған алтын көпірге айналды.

Мұнан кейін қала ішіндегі көп­қабатты тұрғын үйлердің қасбеттерін қайта жаңғырту жұмыстарымен та­нысып шықтық. Кейінгі кездері қала­дағы көпқабатты тұрғын үйлердің сыртқы көрінісі көз тартады. Әсі­ресе, орталықтағы үйлер жаңа кейіп­ке енген. Әрлеу, жөндеу, қаптау жұ­мыстары жыл сайын жалғасуда. Сыртқы жаңғыртумен айналысатын мердігер «Ақмар» ЖШС-ның өкілі Әміржан Бейсенов ат­қа­рылып жатқан жұмыстар жөнін­де кеңінен айтып берді.

– Осы салада жүргенімізге бір­шама уақыт болды. Былтыр да қа­ланың бірқатар көпқабатты тұр­ғын үйінің сыртын қаптап, сәнін кел­тірген болатынбыз. Биыл да жаң­ғырту жұмыстарын қолға алдық. Атап айтар болсақ, Абай, Қонаев, Әйтеке би көшесіндегі және ша­ғын аудандардағы көпқабатты тұр­ғын үйлерді жаңғыртамыз. Бұл жұ­мыстарды бастап кеттік. Қажетті ма­­териал арнайы Қарағанды қала­сын­дағы заводтан келеді.

Сапасы өте жоғары. Ыстық, суыққа төзімді. Жөн­деу жұмыстарына 56 адам жұ­мылдырылған.

Мына қапталып жат­қаны бесінші үй. Әр тұрғын үйдің құрылысына 12 адам тартылған. Жоғары-төмен түсуге арналған 20 құ­­рылғы пайдаланылуда. Бес ай уа­қыттың ішінде жұмыс толық аяқ­та­лады деп отырмыз. Қазір Абай даң­ғылы №33, Тоқмағамбетов №1 деп аталатын екі үйді аяқтап қойдық, енді Абай №28, Әйтеке би №26, Қонаев №26-дағы үйлер қапталуда, – дейді ол.

Былтыр 20 көпқабатты тұрғын үйдің қасбетін жаңғырту жұмыс­та­рын «Ақмар», «ВSG инжениринг» ЖШС жүргізді. Биыл 21 көпқабатты тұрғын үйдің сыртын қаптау үшін мердігер мекеме жұмысын бастап кетті.

Сондай-ақ көпқабатты тұрғын үйді жаңғыртумен қатар, ауласын­дағы ойын алаңдарын жөндеу жұ­мыс­тары да қолға алынған. Былтыр қаладағы 25 көпқабатты тұрғын үйдің ойын алаңы күрделі жөндеуден өтті. Оның ішінде 15 балалар ойын алаңқайын мердігер «Азамат құ­ры­лыс» қайта жөндесе, 10-ын «Аван­гард» ЖШС іске асырды.

Биыл 20 ойын алаңының құрылысына жоба-сметалық құжат­тары әзірленіп, бюд­жеттік өтінім жол­данған. Қаражат қаралса, іс бас­талмақ.

Сара АДАЙБАЕВА,

«Сыр бойы»

syrboyi.kz