Желтоқсаншы аралдық қыз, №220 орта мектептің тілегі Айнаш ӨТЕПБЕРГЕНОВАҒА

АРАЛДЫҢ АДАМДАРЫ

(Астана күніне орай мерекелік арнау)

1986 жылғы Желтоқсан көтерілісіне қатысқан аралдық қыз, №220 орта мектептің тілегі

Айнаш ӨТЕПБЕРГЕНОВАҒА

Желтоқсанның жел қағынған күндері,

Қыстан суық қақсалдардың түрлері.

Қос ызғардың өтіндегі Айнаштың

Есінде әлі ұлы топпен жүргені...

Тасталды ма қияметтің қармағы,

Жын-перідей қиғылықты салғаны.

Сонда көрді компартия лаңын,

Үзілмегей бойжеткеннің арманы.

Құлағандай қара бұлттан жай тасы,

Өмірменен болды өлімнің айқасы...

Сұм солдаттың соққысынан таяқ жеп,

Жылап тұрды-ау Аралымның Айнашы.

...Жо-жоқ, Айнаш бұл күресте сынбапты,

Дабыл соққан дәуір үнін тыңдапты,

Қазағының ақ таңына сенген соң,

"Елім, жерім, ұлтым!" деп ол үн қатты.

Көтерді ару қасаң кезең қом-жүгін,

Жібіте алды қатқан жүрек тоңдығын:

Ұрпақ жайып, дөңгеленткен кәсібін,

Шиеліде шырайлы әже ол бүгін!

Ерғали АБДУЛЛА,

"Арал әлемі" газеті, 2026 жыл.