Сыған қызы: Теміртауда екі ер адамды не үшін атып тастады
2001 жылы 17 мамырда екі дос Теміртаудың көшелерінің бірінде шағын кәсіптері жайлы жоспар құрып келе жатқан. Олар Бұқар жырау - Камиссарова көшелерінің қиылысында бағдаршамға келіп тоқтаған. Жасыл түс жанғанда жүрген оларды жеңіл көлік қағып кетуге аз қалып тоқтаған. Бақыт Дүйсенбаев не болғанын түсінбей қалған. Артынша, көліктің рөлінде отырған жігітке ескерту жасаған. Жүргізуші көліктен түсіп, жаяу жүргіншіге тап берген. Көлікте отырған қыз да жанжалға қосылған. Артынша, келіншек сөмкесінен қару алып, бірнеше рет жаяу жүргіншіге атты. Содан кейін жұп көлігіне отырып оқиға орнынан кетіп қалған. Қылмыскерлерді табу қиынға соқты. Олар оқиғадан соң бірден қаладан қашып, ізін жасырып үлгерген.
Бақыт Дүйсенбаевты атып тастаған арудың кім екенін анықтау қиын болған жоқ. Ол бүкіл қалаға әйгілі сыған баронының қызы Роксана Боровская болып шыққан. Ал жанындағы күйеуі Гари Ямдиев болатын.
Баронның туыстарының бәрі қалада болған бірталай қылмысқа қатысы бары анықталды. Алайда, осы уақытқа дейін құқық қорғау органдары олардың қылмысын дәлелдей алмай келген.
Роксана Боровская жастайынан-ақ есірткі қолданғаны үшін қамауға алынған. Оның күйеуі де нашақор болған екен.
