"Бір дүкенім жоқ": Мейрамбек Бесбаев тойдың арқасында күн көріп жүргенін жеткізді
Өнер иесі шығармашылық үшін жаралған адам екенін тағы бір мәрте дәлелдеп, бірнеше істің басын бастаса да, аяғына дейін жетпегенін айтып берді. Телеарна, радио ашып, өнерді дәріптеу де Мейрамбек Бесбаевтың ойында болған көрінеді. "Телеарна ашуды баяғыда армандағанмын. Оның да құжаттары өте көп. Ортасына келген кезде шаршадым. Музыкалық радио да ашқым келді. Оның атын "Аспан" дедік. Неше түрлі ат қойып армандадық. Радионы да аша алмай қойдым. Мен сияқтыларға ашуға болмайды екен. Кедергісі көп", - деп жазды өнер иесі.Әншіге көптеген нәрсе кедергі болған көрінеді. Әсіресе құжат мәселесіне келгенде бәрін жарты жолдан тастап кетемін дейді ол. Бизнес жасауға да икемі келмеген өнер иесі табыс көзінің той екенін жасырмай ашық айтты.
"Сосын жарты жолға келгенде қоясың ғой, өзіңде. Байығым келіп, бизнес те жасағым келді. Оны да істей алмадым. Құжаттар мен таныстар керек. Бәрі қашан бітеді деп тозып кеттім. Сенесіңдер ме, 89 жылдан бері бір дүкенім де жоқ. Тойға барсақ, елдер соны да көре алмай жатады. Тоймен ғана күн көріп жатырмыз ғой", - дейді Мейрамбек Бесбаев.
