Ақтөбедегі №38 мектепте қайғылы жағдай болды. 10 жастағы оқушы Дильназ Әбішева сабақ үстінде әлсіреген. Мұғалімдер жедел жәрдем қызметіне 18 рет қоңырау шалған, бірақ олар дер кезінде келмеген. Салдарынан оқушы мектепте қайтыс болды, деп хабарлайды Baq.kz ақпарат агенттігі diapazon.kz сайтына сілтеме жасап.

«Дильназ әкесін емдегенді жақсы көретін, дәрігер болуды армандады», - дейді оқушының анасы Зәуреш.

«Оқиға екінші ауысымында болды. Бесінші сабақта қыз бала өзін нашар сезінді. Біз жедел жәрдемге 18 рет қоңырау шалдық. Болмаған соң ұстаздар жедел жәрдемді көшеден тоқтатып әкелді. Бірақ оқушы қыз қайтыс болып кетті. Оқушы ауырып жүрген екен. Үйінде де талықсып, құлаған көрінеді. Осыған дейін сыныпта да бір рет құлаған. Сол кезде дәрігер оған шай беріп, су беріп, үйіне қайтарған болатын. Баланың гемоглобині төмендеп, жүрегі ауыратын болған. Мұғалімдер баланың отбасына материалдық көмек көрсеттік. Басқа қолымыздан не келеді? Өте өкінішті. Дильназ өте сабырлы болатын, үлгерімі орташа еді. Анасын шақырттық. Дәрігер алғашқы көмек көрсетті, бірақ ештеңе көмектеспеді», - дейді мектеп директорының орынбасары Бимаш Тілеубергенова.

«Дильназ ауырып жүрді деген жалған сөз. Оның туғанда салмағы 4200 болды, денсаулығында ешқандай кінарат болған емес. Емханада карточкасын ашып қарады. Олар да қызыма не болғанын түсінбей отыр. Сарапшылардың өзі оның барлық ағзасы сау болғанын айтады. Жүрегі аяқ астынан тоқтап қалған. Нақты неден қайтыс болғанын Алматыға жіберілген сарапатама қорытындысы келген соң білетін боламыз. Сол күні орыс тілі мұғалімі маған телефон шалып, Дильназдың ауырып тұрғанын айтты. Мен жұмыстан жүгіріп шығып, 4 қабатқа көтерілдім. Барлық бала дәлізде жүрді. Дильназ сыныптағы партаның үстінде жатты. Менің көзімше мектеп дәрігері оған жасанды тыныс алу жолымен көмек көрсетті. Қызымның тыныстап, дем алғандай болғанын байқап, қуанып едім. Бірақ, реаниматолог ауруханада қызымның қайтыс болғанын айтты. Қызым жедел жәрдеммен ауруханаға кеш жеткізілген. Оның жүрегі қалайша тоқтап қалуы мүмкін? – дейді оқушының анасы.