Бүгін футболдан Қазақстан құрамасы Черногориямен кездеседі

Бүгін футболдан Қазақстан мен Черногория құрамалары жолдастық кездесу өткізеді.Кездесу Черногория астанасы - Подгорице қаласында өткізіледі. Ойын елорда уақытымен сағат 23.00-де басталып, Qazsport телеарнасынан тікелей эфирде көрсетіледі. Қазақстан аталған қарсыласымен бұдан бұрын үш мәрте кездесті. 2008 жылдың 27 мамырында Подгорицеде өткен жолдастық кездесуде олардан 0:3 есебімен жеңіліп қалды. Одан кейін екі құраманың жолы 2018 жылғы әлем чемпионатына іріктеу кезеңінде Е тобында түйісті.

Алдымен 2016 жылдың 8 қазанында Подгорицеде 0:5 есебімен есе жіберген қазақстандық құрама 2017 жылдың 1 қыркүйегінде елордада оларға 0:3 есебімен есе жіберді. Черногория құрамасы 2007 жылдан бері әлемдік футболдағы түрлі жарыстарға қатысып келеді. Әзірге әлем және Еуропа чемпионаттары финалдық кезеңіне шыға алған жоқ. FIFA жариялаған соңғы рейтингте олар 64-орында тұрса, Қазақстан құрамасы 119-орында.

Бүгінде екі құрама UEFA Ұлттар лигасында ойын көрсетіп келеді. Аталған турнирде С лигасында бірінші топта Черногория 9 ұпаймен көш бастап тұрса, Қазақстан төртінші топта соңғы орында келеді.

Естеріңізге сала кетелік, Қазақстан құрамасы енді Ұлттар лигасында екі ойын өткізеді. Алдымен 15 қазанда сырт алаңда Албаниямен шеберлік байқасса, 18 қарашаа өз алаңында Литваны қабылдайды.

www.inform.kz