Мектеп ұланы – Қазақстан чемпионы

Жақында Қазақстан Республикасы Мәдениет және спорт министрлігінің спорт және дене шынықтыру істері комитетінің ұйымдастыруымен шахматтан Қазақстан Республикасының 10 жасқа дейінгі рапид түрінен өткен жекелей чемпионатында Арал қаласындағы Ж.Әбдірашев атындағы №62 мектеп-лицейдің оқушысы  Ақылжан Мейірханұлы ұлдар арасында І орынды иеленіп, Қазақстан чемпионы атанды.

Шахмат ойыны – балаларға тек қуаныш сыйлайтын ойые ғана емес, ойлауды дамытудың тиімді құралы.Сондықтан шахмат арқылы адам баласының дүниетанымы кеңейіп, сөздік қоры, ойлау қабілеті дамиды. Міне, осындай білім сауаттылығын арттыратын шахматтан Ақылжанның  бауырлары да ел чемпиондары атанған. Олардың алды – №62 мектеп-лицейді «Алтын белгімен» тәмамдаған үздік түлек. Балаларының білім мен спортта жеткен жетістіктеріне қуанған ата-анасы, Бармағанбетовтер отбасының Жасұлан Айтжанов басшылық ететін мектеп-лицей ұжымына айтар алғыстары шексіз.

Әр өңірдің ең үздік шахматшылары қатысқан жасөспірімдердің зияткерлік сайысында аймақ абыройын асқақтатып, «Бұл жеңісім – ел Тәуелсіздігінің 30 жылдығына қосқан үлесім» деген жігерлі жасқа әлемдік бәсекелерде ел мерейін асырар ақ жол тілейміз. 

К. МАХСҰТ