Сыр бойындағы сайыс
Бұл күндері Қызылордада еркін күрестен 23 жасқа дейінгі балуандар арасында Қазақстан чемпионаты өтуде.Еркін күрес шеберлері сайысының жалпы есебінде Шығыс Қазақстан облысының құрама командасы көш бастады. Жамбылдықтар екінші орын алса, Шымкент қаласының өкілдері үшінші сатыға табан тіреді. Жекелеген салмақтарға келер болсақ, 65 килодағы Адлан Асқаровтың асқан шеберлігіне тәнті болдық. Алматы облысының аса дарынды балуаны кезінде жасөспірімдер мен жастар арасындағы әлем біріншіліктерінде жүлдегерлер санатынан көрініп, былтыр ересектердің Азия чемпионатында күміс медальді мойнына ілді. Бұл жарыста Адлан алдына жан салмады. Финалда ол өскемендік Әсет Бауыржановтан басым түсті. Аса ауыр салмақта күш сынасқан Бекзат Тәжінің де қарқыны күшті болды. Барлық қарсыласының аяғын көктен келтірген Сыр бойының сайыпқыраны финалда өзінің командалық әріптесі Дастан Сағындықты сан соқтырды.
Өзге салмақтарда Мұхамед Балғабай (57 кило) мен Шыңғыс Мұхаметқалиев (74 кило), Асылжан Есенгелді (61 кило) мен Еркебұлан Шынықұл (70 кило), Дәулет Ергеш (79 кило) пен Юнус Гафуров (97 кило), Мақсат Сатыбалды (86 кило) мен Ризабек Айтмұхан (92 кило) теңдессіз деп танылды.
egemen.kz
