Жастар әлем чемпионатына жолдама алды
Еліміздегі бұқаралық спортқа деген ерекше қолдау мен айрықша көзқарастың нәтижесін ұзақ күте қоймадық. Жаһандық ареналарда топ жарып, жүлде салып жүрген спортшалардың бүгінгі жетістігі де сол қолдаудан бастау алғаны ақиқат. Бұл ретте аудан спортшылары да қалыс қалмады. Осыдан шамалы уақыт бұрын ғана ауданда кенже дамыған спорттың бірі саналған жекпе-жек түрлері болса, бүгінгі таңда аралдық өрендер әлемді мойындатып, талай мәрте алтыннан алқа тағып үлгерді. Солардың бірі әмбебап жекпе-жектен өз салмағында әлемнің теңдессіз спортшысына айналған Фараби Сауытбаев болса, бүгінде чемпионның шәкірттері де чемпион атанып үлгерді.Иә, осындай жағымды жаңалықтардың бірі жуырда ғана құлағымызға шалынды. Түркістанда өткен жастар арасындағы ҚР чемпионатында әмбебап жекпе-жектен 4 бірдей балғын спортшымыз жүлделі қайтты. Нақтырақ айтар болсақ 55 кг салмақ дәрежесінде Нұралы Кемалов ІІ орын, 70 кг салмақ дәрежесінде Сырым Совет ІІІ орын, 80 кг салмақта Ельдар Қаниев ІІ орын жеңіп алса, 60 кг-да өнер көрсеткен Дінислам Болатбекұлы ел чемпионы атанып, «спорт шебері» атағына қол жеткізді.
Тағы бір айта кетерлігі Н.Кемалов пен Д.Болатбекұлы Грузиядағы әлем біріншілігіне қатысу мүмкіндігін иеленді.
Айта кетейік, осы уақытқа дейін де Қостанай қаласындағы жастар арасындағы ел біріншілігінде панкратионнан чемпион атанған Ернұр Әбжәмиев те Ташкенттегі әлем чемпионатында бақ сынасатын болады.
Мақсаты айқын, жетістікке жетудің жолын білетін жергілікті жас спортшыларға алдағы уақытта да сүйінші хабар жеткізеді деп сенеміз.
О. ЖОЛДАСОВ
