Жаңажол Қуанышбек – әлем чемпионы!

Афинада (Грекия) өтіп жатқан грек-рим күресінен жасөспірімдер арасындағы U17 әлем чемпионатында Қазақстан құрамасы үшін тарихи сәт орын алды. 45 келі салмақ дәрежесінде ел намысын қорғаған Жаңажол Қуанышбек финалдық белдесуде қырғыз балуаны Нуркерим Кумарбековті айқын басымдықпен жеңіп, әлем чемпионы атанды, деп хабарлайды BAQ.KZ.
Бұл – қазақ жас балуандары үшін үлкен жетістік. Жаңажолдың жеңісі – тек жеке жеңіс қана емес, сонымен қатар еліміздегі балуандық мектептің жүйелі дамуының нәтижесі.

Айта кетейік, бұл чемпионатта Қазақстан жасөспірімдер құрамасы жалпы командалық көрсеткіш бойынша да жақсы нәтиже көрсетіп келеді. Бұған дейін: 
Нұрдәулет Құмарұлы (48 келі), Нұралы Асқар (55 келі) — күміс жүлдегер атанса,
Шамиль Досбол (65 келі) — қола медальға ие болды.
Жас спортшыларымыздың табандылығы мен рухының арқасында Қазақстан күресі тағы бір мәрте әлем аренасында биік белесті бағындырды.

Фото: ​baq.kz​​​