АРАЛДЫҚ СПОРТШЫЛАР ӘЛЕМ ЧЕМПИОНЫ АТАНДЫ
Спорт – елдің мерейін асырып, абыройын тасытатын сала. Осы орайда, спортты жандарына серік ете отырып, ауданның намысын қорғап жүрген жандардың бірі Әліби Болатұлы мен Фараби Сауытбаев ағымдағы жылдың 18-25 қарашасы аралығында Қара теңіз жағалауындағы Ресей федерациясының Анапа қаласында өтіп жатқан «UNIFIGHT» әмбебап жекпе-жек спорты бойынша Қазақстан құрамасы сапында өнер көрсетіп, әлем чемпионы атанды.Атап айтқанда, әлемдік деңгейде өткен чемпионатта 75 келі салмақ дәрежесі бойынша өнер көрсеткен Арал ауданының №19 олимпиадалық резервтің мамандандырылған балалар-жасөспірімдер мектебінің спортшысы Әліби Болатұлы финалдық бәсекеде Ресей спортшысын өте ауыр бәсекелестікте ұтып, чемпион атанса, Фараби Сауытбаев 60 келі салмақ дәрежесі бойынша бәсекеге түсіп, ақтық мәреде Ресейлік бірнеше дүркін әлем чемпионы Бурят Джабалов Дашаны жеңіп, жеңіс тұғырынан көрінді.Спорт саласындағы Әліби мен Фарабидің осы бір дүбірлі жеңісі Арал ауданы спортынының тарихында алғашқы әлем чемпиондарының тізімін қалыптастырып берді деуге болады.
Жалпы командалық есепте жерлестеріміздің сүбелі үлесінің арқасында Қазақстан ұлтық құрамасы Ресей федерациясынан кейін 2-орыннан табылды.
Сонымен қатар, жерлестеріміздің бір ауданнан шыққан спортшылар екенін және бұл үлкен жетістік екенін ескерген бүкіләлемдік «UNIFIGHT» федерациясының президенті Сергей Новиков Қазақстан Республикасы аймағында «UNIFIGHT» спортын дамытуға және қолайлы жағдай туғызуға сіңірген еңбегі үшін Арал ауданы әкімі М.Ә.Оразбаевқа алғыс хатын аманат етіп, Қазақстан Республикасы ұлттық құрама делегациясының мүшесі №19 Арал ауданының олимпиадалық резервтің мамандандырылған балалар-жасөспірімдер мектебінің директоры С.А.Алмагамбетовке табыс етті.
