Бас жүлде жерлесімізде
Жақында Түркістан облысында өткен «Түркістан – Ер Түріктің бесігі ғой...» республикалық әдеби байқауының және «Түркістанды бірге түлетейік» шығармашылық байқауы қорытындыланып, нәтижесінде жерлесіміз, әріптесіміз, ақын Толыбай Абылаев бас жүлдені еншіледі.Байқауларға республикамыздың барлық өңірінен 100-ден аса қаламгер мен әлеуметтік желі қолданушылары қатысып, бағын сынады. Марапаттау рәсімін облыстық Қоғамдық даму басқармасының басшысы Дамир Жүнісов ашып беріп: «Мұндай байқаулардың өтуі – руханият саласына үлкен серпіліс алып келеді. Байқауға түскен тың туындылар, маңызды мәліметтер арқылы Түркістанның тарихын өскелең ұрпаққа жаңаша бағытта насихаттай аламыз», – деп, қатысушыларға алғысын білдірді.Поэзия және проза жанры бойынша өткен сайыстың басты мақсаты – жас облыс орталығы – Түркістанның терең тарихын жырлау. Рухани шара қаламгерлерге шабыт сыйлады.
Байқаудың жүлделі бірінші орыны Қарағанды қаласынан қатысқан Жанат Жаңқашұлына берілсе, түркістандық Батырхан Сәрсенхан екінші орын, Қостанай облысынан Ақылбек Шаяхмет үшінші орынды қанжығасына байлады. Ал байқаудың бас жүлдесін иеленген сөз зергері, жерлесіміз Толыбай Абылаев жалынды жырымен дараланды. Ақынның байқауға ұсынған «Иасы-Түркістан» поэмасын осы сілтемеге өту арқылы оқи аласыздар.
Әріптесімізді құттықтап, шығармашылық табыс тілейміз!
«Толқындықтар»
