Төтенше жағдай: "Алтын белгі" беру ережелеріне өзгеріс енгізіле ме?
"Алтын белгі" беру ережелері өзгеріссіз қалады, деп хабарлады ҚР Білім және ғылым министрлігінің баспасөз қызметі.
2017 жылдан бастап ҰБТ-да "Алтын белгіні" растау талап етілмейді. 5-11-сыныптар аралығында барлық пән бойынша қорытынды жылдық бағасы "5" болса және бітіру аттестаттау емтихандарын үздік тапсырса, жеткілікті, - делінген ҚР БҒМ-нің телеграм каналында.
Қазақстанда енгізілген төтенше жағдай мен оқушылардың қашықтан оқыту түріне ауысуына байланысты ҚР Білім және ғылым министрлігі 9 (10) сынып оқушылары үшін қорытынды аттестаттау емтихандарын, ал 11 (12) сынып оқушылары үшін мемлекеттік қорытынды аттестаттау емтихандарын өткізбеу туралы шешім қабылдады. Сондықтан, "Алтын белгі" жылдық қорытынды бағаларының негізінде беріледі.
Ведомствоның хабарлауынша, "Алтын белгі" алуға 7 444 түлек үміткер.
Еске салайық, бұған дейін ҚР Білім және ғылым министрі Асхат Аймағамбетов білім және ғылым салаларындағы қордаланған мәселелерге тоқталып, саланы цифрландыру керек деген болатын.
https://baq.kz/
