Қызылорда облысында мемлекеттік қызметшілерге арналған республикалық конкурс өтуде

Қазіргі таңда «Үздік мемлекеттік қызметші» және «Үздік ауыл әкімі» республикалық конкурстары өтуде. Конкурстың мақсаты – жергілікті өзін-өзі басқаруды дамытуға және жергілікті маңызы бар мәселелерді тиімді шешуге үлес қосқан, жұмыста жоғары практикалық нәтижелерге жеткен ауыл әкімдерін анықтауға және көтермелеуге бағытталған. Бұл туралы Өңірлік коммуникациялар қызметінің ақпараттық алаңында Қазақстан Республикасының Мемлекеттік қызмет істері агенттігінің Қызылорда облысы бойынша департаментінің басқарма басшысы Жасұлан Шынтасов баяндады деп хабарлайды kyzylorda-news.kz.
«Дәстүрлі «Үздік мемлекеттік қызметші» байқауы өңірлік және республикалық екі кезеңнен тұрады және дистанциялық форматта өткізіледі. Конкурсқа мемлекеттік қызметтегі өтілі бір жылдан кем емес, құжаттарды қарау кезінде алынбаған әкімшілік, тәртіптік жазалары жоқ қызметшілер қатыса алады. Конкурсқа қатысу үшін бекітілген нысандағы өтініш беріліп, сауалнама толтырылады. Қызметтік тізім мен «Неге мен Үздік мемлекеттік қызметші атағына лайықпын» тақырыбындағы мотивациялық эссе конкурстық комиссияға ұсынылады. Ал, «Рухани жаңғыру» бағдарламасы аясында «Үздік ауыл әкімі»республикалық конкурсы алғаш рет ұйымдастырылуда», – деді Жасұлан Қанибайұлы.
Байқау өңірлік және республикалық екі деңгейден тұрады. Байқау нәтижелері қыркүйек айында белгілі болады. Сонымен қатар,конкурс барысында халықтың пікірі ескеріледі. Ол үшін облыс әкімдіктерінің ресми сайттарында жергілікті әкімнің тиімді жұмыс істеуіне халықтың қанағаттануын бағалау үшін сауалнама орналастырылатын болады.
Конкурстар туралы толық ақпаратты ҚР Мемлекеттік қызмет істері агенттігініңжәне облыс әкімдігің сайтынан, сонымен қатар 8/7242/705626 телефоны арқылы білуге болады.