Аурумен бірге күресейік

Елімізде төтенше жағдай тоқтатылып, халық қатынасы қайта қалпына келе бастады. Бұл коронавирустан толық айықтық деген сөз емес. Жұмысы тоқтаған нысандар ашылып, қашықтан жұмыс істеген жандар күнделікті қалыпты өмірге қайта оралғанымен, санитарлық талаптарды қатаң сақтау керек еді. Бірақ көбіміз бетпердені тастай салып, көшеге шықтық. Ештеңе болмағандай жаймашуақ, жайбарақат тұрмысымызға бірден көшіп кеттік. Тіпті «бетпердесіз кіруге болмайды» деген жазуды оқи тұрып, бетпердесіз тұрған сатушыны да, сатып алушыны да жиі кездестіруге болады.Біздің осындай немқұрайлы қарауымыздың салдары бір ғана өзімізге емес, тұтас бір ұлтымызға зиянын тигізуі мүмкін екендігін ойлауымыз қажет. Коронавирус жұқтырғандар санына қарайтын болсақ, күн санап еселенуде. Тіпті біздің Арал ауданының өзінде науқасқа шалдыққандар саны 40-тан асып түсті. Күн санап өзгеріп жатқан көрсеткіште науқастар көбейіп жатыр. Бұлай жалғаса беретін болса, бұрынғыша қалыпты өмірге оралуға әзір ерте болады.
Аурудың нақты емі табылмағандығын естен шығармағанымыз абзал. Сондықтан да ел болашағы үшін мүмкіндігінше жеке бастың талаптарын қатаң сақтап, қолды жиі жуып, бетперде тағып, көпшілік орындарда арақашықтық сақтауымыз қажет.

Е. ДОСЖАНОВ,
қала тұрғыны