Салғырттық сан соқтырмасын

Ел аумағында төтенше жағдай режимі аяқталғанмен, карантин шаралары жалғасуда. Бірақ сақтануға салғырт қараудамыз. Тіпті арамызда індеттің бар екендігіне шүбә келтіретіндерде бар. Солардың сөзіне еріп, бетперде тағуды қойғандар да  жетерлік. Ал күнделікті жаңалықтарды қалт жібермей көріп, тыңдап отырған жұрт пандемияның әлі басылмай тұрғанын бірден аңғарып, барынша сақтануда.Осы орайда ауданда да індет жұқтыру дерегінің артуы көпті ойландыруы керек. Олардың бәрі де біздің арамызда жүрген жандар. Сондықтан қай жерде, қалай жұғады деуге болмайды. Тіпті науқастарды емдеп жатқан дәрігерлердің өзі ауру жұқтыруда. Сол үшін «сақтансаң сақтайдыны» әзір естен шығармағанымыз абзал.
Осындай әбігерге түскен кезде қарынды аштыратын жайлардың бірі –себепсіз басқосулар. Ондай жерде үлкен де, кіші де бір-бірімен араласып, «жұрттың бәрі қыдырып жүр ғой» деген пікірді де қалыптастырады. Тиісті орындардың талабын бәріміз бірдей орындасақ, мұндай жағдайларға жол берілмес еді. Естіп-көріп жатқанымыздай, мыңдаған қазақстандықтар аурудан зардап шегіп, соңы тіпті өлімге дейін апаруда. Отбасымен ауру жұқтырғандар қаншама. Қалыпты кез де келер. Той тойлайтын уақыт та болар. Тап мынадай шақта амандық-саулығымызды алыстан біліп, бір-бірімізге ақыл-кеңесімізді айтып отырғанымыз дұрыс. «Аурудың айтып келмейтіні» әркімнің ойында тұрса деймін.

Мәншүк ЖОРҒАБАЕВА,
зейнеткер,
Арал қаласы