Сын сағатта сыр алдырмайық

Мемлекет басшысы Қасым-Жомарт Тоқаев телевизиялық үндеуінде пандемияға байланысты қалыптасқан жағдайдың өте күрделі екендігін атады. Шындығында көзіміз жетіп отырған статистика адам шошырлық көрсеткішке жетті. Аты жаман аталмыш індет бүгінге дейін әлем бойынша 12 миллионнан аса адамға жұқса, салдарынан 500 мыңнан аса адам бақилық болған. Өкініштісі осы бір індет біздің елімізді де айналып өтпей, 50 мыңнан аса отандасымызға жұққан. Қайтыс болғандардың саны да тоқтар емес. Бұл індетпен күресте әлемнің АҚШ бастаған алпауыт елдерінің өзі қауқарсыздық танытуда. Дәл қазіргі уақытта қазақ қоғамы осы бір қиындықпен бетпе-бет келгенін жасыра алмаймыз. Дәрменсіз дәрігер, қауқарсыз науқас. Ал дертке шипа болады деп іздеген дәрі де табылмай жатыр. Ауруханаларда ұзын-сонар кезек. Барлығы да жақынын жамандыққа қимай жанталасып жатыр. Осындай кезде ел ішіндегі елең-алаңға бей-жай қарамай, қажетті шараларды қабылдау керектігін айтқан Мемлекет басшысы Қасым-Жомарт Тоқаев:– Дәрігерлеріміз бұқаралық ақпарат құралдары арқылы азаматтарға нақты, бірізді мәлімет беруі керек. Дертті емдеудің неше түрлі жолдарын көрсетіп, адамдардың денсаулығына қауіп төндіруге болмайды. Бұндай әрекеттерге тосқауыл қою керек. Қылмыстық кодекстің 174-бабына сәйкес жалған ақпарат таратқан адам жауапқа тартылады. Құқық қорғау органдары ел ішіндегі осындай жөнсіздікке қатысты қатаң шаралар қолданатын болады. Сол сияқты дәрі-дәрмектің бағасын бірнеше есе өсіріп, қалыптасқан жағдайды өз мақсатына пайдаланғысы келген алыпсатарларды да құқық қорғау органдары менің тапсырмама сәйкес жауапқа тарта бастады. Қазір мемлекеттік органдар елді мекендерді қажетті дәрі дәрмекпен толық қамтамасыз етуде. Осыған орай, тиісті қор жасақталған. Төсек орындары да, медициналық қызмет көрсету ісі де толығымен қамтамасыз етіледі, - деді.
Қарапайым халыққа қазіргі уақытта ең қажеттісі дәрі-дәрмек пен қажетті ақпараттардың дұрыс жетуі. Десе де ұрымтал сәтті өз мақсаттарына пайдаланып, қу құлқынның қамын күйттеп жүргендерге Мемлекет басшысының тапсырмасына сәйкес тиісті жаза қолданылады деген сенімдеміз. Бастысы халыққа керек нәрсе уақытында тыбылып тұрса дейміз.

А.Қасымова,
қала тұрғыны.