ЗҰЛМАТ ЖЫЛДАР БЕЙНЕСІ
Арал қалалық тарихи музейінде 31 мамыр – саяси қуғын-сүргін құрбандарын еске алу күніне байланысты «Жазықсыз жазаланғандар» атты фотокөрме өткізілді. Көрменің негізгі мақсаты – сталиндік дәуірдегі жазалау шараларын, халық қасіретіне көрсету, Кеңес Одағы кезіндегі Қазақстанда салынған еңбекпен түзеу лагерьлерінің тарихына шолу жасау. Осы арқылы оқушыларды өткенімізбен таныстырып, ұлтжандылығын қалыптастыру.Кеңестік билік жергілікті тұрғындардың ұлттық ерекшеліктері мен мүдделерін қорғаушыларға, ұлттық автономия құру идеясын қолдаушыларға «тап жаулары», «ұлтшылдар», «жат пікірдегілер», «әлеуметтік қауіпті элементтер» деген жала жапқаны белгілі. Осы арқылы халықтың оларға деген теріс көзқарасын қалыптастыруға жұмыс істеді. Халықтың қамын жеген ұлт қайраткерлерінен сескенген тоталитарлық билік өкілдері тығырықтан шығар жолды іздеді. 1925 жылы қыркүйекте Қазақстанға басшылық қызметке Ф.И.Голощекиннің келуі елде орын алып отырған жағдайды одан бетер ушықтырды. Ол Қазақстанды кеңестік өзгерістерден тыс қалған деп санап, онда «Кіші Қазан» төңкерісін жүргізу саясатын ұстанды. Оның жүргізген саясаты ұлт зиялыларын жаппай қуғындауға ұласты. Голощекин өзіне қарсы шыққандарды қызметтерінен алып, республикадан қуды, олардың көзін жоюды қолға алды.Міне, тарихтың қатпарлы беттері ұлттың құрып кетуіне дейін жеткізді. Ал кейінгі ұрпақ бұл қасіретті жылдарды ұмытпауы тиіс. Осыны мақсат еткен қалалық музей ұжымы жас буынға тағылымы мол шара ұйымдастырып, оған қаладағы №13 орта мектептің 9 сынып оқушылары қатысты. Олар көрмедегі материалдармен танысу арқылы кешегі зұлмат жылдардың бейнесін көрді.
