Құрылыс қарқынды жүруде

Аудандағы ауқымды құрылыс жұмыстары жайында аз айтылып жүрген жоқ. Оны көзі қарақты оқырман газет бетінен де көріп жүр. Жалпы, әлеуметтік нысандардың көптеп бой көтеруі әлеуетімізді көрсетеді. Бүгінде денсаулық, спорт, білім нысандары қала көркіне көрік қосуда. Солардың бірі қаламыздағы   300    орындық№14 мектеп лицейінің құрылыс барысы бүгінде қарқынды жүріп, аяқталуға жақындады. Құрылыстың бас мердігері Қызылорда қаласынан келген «Өмірзақ» ЖШС жаңа мектепті тамыздың соңына дейін тапсыруы тиіс. Қыркүйек айының алғашқы күні-Білім күнінде жаңадан салынған білім ордасы есігін айқара ашып, оқушылар мен ұстаздарды құшақ жая қарсы алмақ. Осыған орай біз бой көтеріп жатырған нысанның жай-жапсары жөнінде мектеп директоры Ш. Бекееваны сөзге тартқанбыз.
- Мектеп құрылысы жоспарланған қарқынмен жүргізіліп келді. Негізгі жоба 2017-2018  жылдарға арналған еді. Жобаның сметалық құны – 814 645 мың теңге. Атап айтар болсақ, 2017 жылға  225 000 мың тенге бөлінсе, 2018 жылға қаралғаны – 414 678,3 мың теңге қаралды. Жаңа мектепте спортзал, асхана, 10 сынып бөлмесі, 2 мультимедиялық және 1 лингафондық кабинет, әкімшілік, медициналық, шаруашылық сынды қосымша кабинеттер болмақ. Сонымен қатар мектеп ауласында волейбол ойынына арналған алаңның болуы жобаланған. Қазіргі таңда мектепте соңғы құрылыс жұмыстары жасалуда. Есіктері мен соңғы сылақ, ауланы абаттандыру жұмыстары жүріп жатыр. Жылу жүргізілді, терезелері қондырылды-дейді білім ұясының басшысы.
Бүгінде мектепті жылумен қамтитын жылужайдың құрылысы аяқталған. Өрт сөндіруге арналған құрал-жабдықтарда орнатылды. Осылайша құрылыс жұмыстары қарқынды жүруде. Қажетті материалдардан ешқандай кідіріс жоқ. Білім ордасындағы балалар саны биыл 1000 ға жуықтады. Алдағы уақытта заманауи үлгіде бой көтерген жаңа мектепте оқушыларымыз өз білімдерінің сапасын арттыра беретін болады.
С.Үсенқұлова