Арал теңізінің ұлтанына 180 мың түп сексеуіл көшеті отырғызылды

Бүгін «Таза табиғат» ұлттық жобасы аясында Арал теңізінің ұлтанына 180 мың түп сексеуіл көшеті отырғызылды. Бұл 100 гектар аумақты қамтыды. Сексеуілді Арал орман және жануарлар дүниесін қорғау жөніндегі мемлекеттік мекемесі екті.

Жалпы облыста жыл соңына дейін 14,3 мың гектарға сексеуіл көшеттері егіледі.

Жоспарланған көлемнің 1000 гектарына көктем айларында, ал 13,3 мың гектар жерге агротехникалық талаптарына сәйкес күзде сексеуіл тұқымдары себіледі.

Мемлекет басшысы алдағы 5 жыл ішінде, орман қорында 2 млрд. және елді мекендерде 15 миллионнан астам ағаш отырғызуды тапсырған болатын. Соған сәйкес, аймақта орман өсіру көлемін ұлғайтудың 2021-2025 жылдарға арналған кешенді жоспары әзірленді. Яғни, алдағы 5 жылда Арал теңізінің құрғаған ұлтанының 213 мың гектарына 177,5 млн. сексеуіл көшеті отырғызылады.