Заманауи кешен халыққа қызмет көрсетуде

Бүгінгі күні дербестіктің көк туы желбіреп, талай игі бастамаларымен айдай әлемді тамсандырған азат еліміз жыл санап өсіп-өркендеп, олқылықтардың орнын артығымен толтырып жатыр. Мәселен, алғашқы жылдары тоқырауға ұшыраған жергілікті кәсіпкерлеріміз, шаруа қожалықтарымыз бүгінде біраз қор жинап, тындырымды тірліктер атқарып, еңселерін тіктей түсті. Біз бүгінде өз кәсібін дөңгелетіп отырған Әлішер Маханов жөнінде әңгіме қозғауды жөн көрдік. Әлішер адал ниетімен, ісімен қоғамға қызмет етіп келеді. Өзін екі қолға бір күрек таба алмайтындардың қатарына жатқызбаған ол құр жатпай шаруасын дөңгелетуде. Ең алдымен ол үйінің жанынан дөңгелек жөндеу шеберханасын ашты. Кейін ісі алға басып, қаламыздағы Абай көшесі №8 үйдің мекен-жайынан «Мансур» сауда кешенін ашты. Жалпы жер көлемі көлемі 1400 шаршы метр болатын жер телімін  2016 жылы сатып алып, өз қаражаты есебінен құрылыс жұмыстарын жүргізген болатын. Қазіргі таңда өз жұмысын бастаған кешенде көлік жуу, құрылыс материалдарын сату мен оқу орталығы бар.  Үстіміздегі жылы пайдалануға берілген ғимарат заман талабына сай жаңа қондырғылармен жабдықталған. Алты адамды жұмыспен қамтып отырған кәсіп иесінің  алдағы уақытта көлік жөндеу орталығын ашсам деген жоспары бар. – Бүгінгі дамыған заманда автокөліктің түр-түрін көруге болады. Осыған орай, автокөліктерге қызмет көрсететін орындар да ашылуда. Өткенді еске түсірер болсақ, автокөлік жөндеу бекеттерін тек қаладан көретінбіз. Ал, ауылда дөңгелек жөндеу шеберханасын көру қиынға соғатын. Көліктің «тілі мен ішек-бауырын» түсінетін азаматтар үйінің жанындағы гараждарынан оны-мұнысын жөндеп алатын. Ал, қазір ауылда бір-екі жерде сервистік қызмет көрсету орталықтары ашылып, көлік иелерінің көзі ашылды. Мамандар ақысына қарай темір тұлпарлардың ақауын лезде тауып беретін жағдайға жетті. Күннен-күнге көліктердің саны артып келеді. Ауылдың ішінде қанша көлік барын санамалаудың өзі артық. Көліктердің дөңгелектерін жөндеу халық үшін бірден-бір қажет деп есептеймін. Сол үшін де тек көлік жуу орталығын ашып қана қоймай, жуырда жөндеу орталығы жұмысын жолға қойсам деген бастамам бар,–деді кәсіпкер. Ал, кәсіпкер болу үшін не істеу керек деген сауалымызға Әлішер Маханов былай деп жауап берді:
– Кәсіпкер болу әр адамның маңдайына жазылған несібе деп айта алмаймыз. Десек те, өз мүмкіндігіне сене білген, алға ұмтылған әр азамат небір сыннан  сүрінбей өтіп, биік белестерді бағындыра алады. Көпке танымал тұлғалардың өмір жолдары бұған мысал. Ал, айталық, бизнес әлемінде емін-еркін кәсіптеніп, өз ісіңді нәсіп ету үшін не істемек керек? Әрине, үйренуден жалықпай, оқып-машықтанып, іздене отырып білім алу қажет. Сол алған біліміңді іске асыру жолында молтәжірибе жинақтап, алдыңа мақсат қоя білсең кәсібіңнен береке табарың сөзсіз. Осы тұрғыда жастарға айтарым, жалындаған жастық шақта өмірге жан-жақтылықпен қараған дұрыс. Оның ішінде, отбасылық бизнесті дамыту бұл ұрпағыңның алдындағы міндетің дер едім. Себебі, жаңа Қазақстанның әрбір тұрғыны бай-бақуатты өмір сүруі керек. Тек мемлекет берген мүмкіндіктерді тиімді пайдалана білсе болғаны.              
Света Үсенқұлова.