Аудан әкімі жол белгілерін жаңарту жұмыстарын бақылады

Аудан әкімі Мұхтар Оразбаев өткен сенбідегі тазалық шарасынан кейін қалаішілік жол белгілерін жаңарту жұмыстарының барысын бақылап өтті. Қазіргі таңда қалаішілік 44,7 шақырымды құрайтын 51 көшенің жол жабынын таңбалау жұмыстары толықтай аяқталған. Бұдан бөлек, 26 көшеге арнайы жаяу жүргіншілер жолағын сызу жұмыстары жалғасуда.
Автомобиль жолдарының жүріс бөлігіне сызба жолақтарын таңбалау жұмыстарына куә болған аудан басшысы жауапты мекемеге сызбалардың қалың әрі сапалы сызылуын қатаң назарда ұстауды ескертті.
Одан әрі теміржол вокзалының маңы, орталық алаңдар мен қаланың басты көшелерін абаттандыру, көркейту-көгалдандыру жұмыстарын аралап көрді.
Қала көркінің ажарын айшықтай түсетін көгалдандыру жұмыстарын қолға алған жұмысшылармен кездескен аудан әкімі жасыл желектерді уақытылы күтіп-баптауды тапсырды.