Қызылорда облысы тұрғындарының 31,5 пайызы коронавирус инфекциясына қарсы екпе салдырды. Мәселен, бірінші компонентін 120 675 адам , ал екіншісін 66 603 тұрғын қабылдады. Бұл туралы Өңірлік коммуникациялар қызметінің ақпарат алаңында өткен брифингте облыстық денсаулық сақтау басқармасының басшысы Сәбит Пазилов мәлімдеді.

«Қазіргі таңда індетті ауыздықтар бір ғана жол бар. Ол – вакцинация. Бізге алып-қашпа сөздерге еруді қойып, ұжымдық иммунитет қалыптастыруға сергектік таныту маңызды. Өзіміздің және отбасымыздың, айналамыздың қауіпсіздігін сақтаудың жауапкершілігін жіті сезінуіміз керек», – деді Сәбит Бексейітұлы.

«Аймақта жыл басынан бері 167 мониторингтік топ 10 мыңға жуық нысанды тексерді. Нәтижесінде 325 карантин талаптарын бұзушылық анықталып, айыппұл салынды. Қазіргі таңда бірқатар шетелде және бізбен көршілес елдерде коронавирус инфекциясы қайта бас көтеруде. Ғалымдар әлемде вирус жұқтырғандардың күрт өсуіне коронавирустың Үндістанда табылған жаңа штамы да себеп болуы мүмкін деген болжам айтып отыр. Ресейде коронавирус инфекциясын жұқтыру жағдайы күн санап артуда. Санкт-Петербургте инфекция жұқтыру оқиғалары санының өскені соншалық, инфекциялық ауруханалардағы палаталар санының тапшылығы байқалуда. Ауруханадағы инфекциялық бөлімде орындар жетіспегендіктен, науқастастар еденге жатқызылуда. Бұл жағдай бізде қайталанбас үшін орай әр адам өз денсаулығы мен жақындарының өміріне аса сақтықпен, жауапкершілікпен қарауды сұраймыз», – деді облыстың Бас мемлекеттік санитариялық дәрігері Динара Жаңабергенова.