Астанада бірінші дәрежелі құрылыс қадағалау инженері
Соңғы уақытта елімізде құрылыс саласының қарқыны артып, кең қанат жая бастады. Ірі жобалар қолға алынып, сәулеті жарасқан еңселі ғимараттар бой көтерді. Индустриялды әлеуметтік нысандар да кезең-кезеңімен ел игілігіне беріліп жатыр. Осындай ілкімді істердің арқасында қалалардың келбеті, ауылдардың ажары айшықталып, қолайлы өмір сүруге жағдай жасалды. Осыдан-ақ, ел қуанышына айналған ғажайып кешендер мен көкпен таласқан көрікті үйлердің көптеп салынуына қыстың суығы, жаздың аптап ыстығында тер төгіп жатқан құрыш қолды құрылысшылардың еткен еңбектерінің ерен екенін аңғарамыз. Осындай іскер де қабілетті маман ретінде елдің әлеуметтік-экономикалық деңгейінің өсуіне айтарлықтай өз үлесін қосып жүрген жандардың бірегей–Ұснадин Шман Шманұлы. Қаншама жыл осы салада тер төге еңбек еткен құрылысшы арман-қиялын жүзеге асырып, шығармашылық қабілетін шыңдаудан еш жалыққан емес. Қашанда сый-құрметке лайық ағамыз жайлы айтар болсақ, ол 1956 жылдың 24 қаңтар күні «Приарал» кеңшарының Сайғонды ауылдық кеңесіне қарасты Жаршағыл ауылында дүниеге келді. Алғаш мектеп табалдырығын туған жердің білім ұясынан аттаған соң, кейіннен қаладағы №177 орта мектепті тәмамдады. Арман қуып қалаға аттанған бозбала, қазіргі Тараз қаласындағы Жамбыл су-мелиоративтік құрылыс институтына түсіп, 1979 жылы гидротехник-құрылысинженері бойынша мамандық алып шықты. Алғашқы еңбек жолын Ресейдің Вологда қаласындағы «Вологдамелиорация» бірлестігінде инженер болып бастады. 1980 жылы елге оралып, Қызылорда қаласындағы «Қызылорда құрылыс» тресіне қарасты «Мәдени-тұрмыс құрылысы» құрылыс басқармасында шебер, прораб қызметтерін абыройлы атқарды. Сол жылдары Қызылорда облыстық-қалалық прокуратурасының ғимаратын, тігін фабрикасының жатақханасын, жол құрылысына пайдаланатын материалдар шығаратын фабрика құрылыстарын (фабрика нетканных материалов) салу кезінде айтарлықтай үлес қосты. Сондай-ақ, Тереңөзек ауданының ПМК-15 (жылжымалы механикаландырылған колонна) мекемесінде прораб, аға прораб қызметтерін атқарып, сол ауданның күріш алқаптарын, гидромелиоративтік нысандар құрылыстарын салуға атсалысты. Өзі қызмет атқарған жерлерде құрылыс нысандарында ерекше қолтаңба қалдырып отырған өз ісінің маманы 1982 жылы Алматы облысы, Іле ауданына қарасты «ПМК-10» мекемесінің шақыруымен жұмысқа шақырылып, аға прораб, құрылыс бөлімі бастығы қызметіне ауысты. АК (үлкен Алматы каналы), Ақдала кіріш алқабы құрылыстарын салу кезінде үлкен жауапкершілікті сезініп, өзіне сеніп тапсырылған істі тиянақты орындай білгені үшін сала тарапынан мадаққа ие болды. Анасының қайтыс болуына байланысты Арал қаласына қайтып оралып, қаладағы «Аралрыбпром» бірлестігінде техникалық бөлімнің инженері болды. Ал, 1987 жылы «Балық шаруашылығы министрлігіне» қарасты (министр Қ.С.Саржанов) Қапшағай қаласындағы «ПМК-1» мекемесінің бастығы болып тағайындалды. Ол мекеме негізінен еліміздегі Алматы, Талдықорған, Жамбыл, Шығыс Қазақстан, Семей, Қарағанды, Жезқазған облыстарында орналасқан балық шаруашылығына қарасты бүкіл нысандардың құрылыс жұмыстарын жүргізетін. Жемісті жылдардың жеңісін көре білген еңбекқор жан 1989 жылы Аманөткел елді мекенінде орналасқан «ПМК-4» мекемесінің бастығы болды және мекеме басшысы ретінде жұмысшыларына бағыт-бағдар беріп, Қызылорда, Ақтөбе, Орал облыстарында орналасқан балық шаруашылығы мекемелерінің құрылыс жұмыстарының сәтті жүргізілуіне үлкен себепші болды. Өмірі еңбекпен өрілген ағамыздың айта берсек, көпке үлгі болатын қызметтік жолдары көп-ақ. Маңдай тердің ащы дәмімен ерте есейген азаматтың сала тарапынан абыройлы атқарған істері ескеріліп, 1992-2002 жылдары Алматы қаласында «Алматы қала құрылысы» акционерлік қоғамының құрылыс басқармасының бастығы, АҚ «Ақсу» вице-президенті қызметтеріне дейін көтерілді. Әсем қала Алматыдағы көп қабатты үйлер, офистер және басқа да құрылыстардың салынуы кезінде өзіндік идеясын шабытымен ұштастыра білді. 2002-2016 жылдары «Жаңа құрылыс» құрылыс компаниясының, кейіннен «Беларық» құрылыс компаниясының президенті болған ағамыздың құрыш қолды құрылысшылары Талдықорған қаласындағы ҰҚК (КНБ) офисы, Талдықорған аэродромы, Астана қаласында Министрліктер үйі, «Нұрсая» тұрғын үй кешені, Дипломатиялық қалашық, ауыл шаруашылығы министрлігі үйлерін салды. Сонымен қатар, СҚО, Ақмола, Қостанай, Қарағанды, Маңғыстау, Атырау облыстарында зәулім ғимараттар мен әсемдігі көз тарта үйлер салынып, халық игілігіне пайдалануға берілді. Қазіргі таңда туған жердің абыройын асқақтатып, ел мақтанышына айналған ағамыз жеке кәсібінен нәсібін көрген кәсіпкер ғана емес, Астана қаласындағы бірінші дәрежелі құрылыс қадағалау инженері, көптеген мекемелерде сараптаушы-эксперт. Еңбегі еленген іскер тұлға жуырда ҚР құрылыс және тұрғын үй коммуналдық шаруашылық комитетінің «Жасампаздар» кітабына есімі енді. Өмірлік те, қызметтік те тәжірибесі мол жан ешқашан сауапты істен шет қалған емес. Әрдайым қайырымдылық шараларын өткізіп, нағыз туған жеріміздің жанашыр түлегі екенін дәлелдеп отырады. Құрылыс жайында былайша сөз сабақтаған Ұ.Шыман:-Құрылыс—экономиканың негізгі діңгегі болып табылады. Кейінгі жылдары республикамызда құрылыс саласы қарқынды дамуда. Құрылыс индустриясы–экономиканың негізгі іргетасы болғандықтан, кез келген елдің экономикалық күш-қуаты мен әлеуметтік тұрақтылығы құрылыс саласының дамуына тікелей байланысты. Мемлекет басшысының қолдауымен Тәуелсіздік жылдары елімізде құрылыс саласын дамытуға барынша жағдай жасалды. Отандық құрылыс индустриясы қанат жайып, құрылыс материалдарын шығаратын өндіріс орындары көбейді. Десек те, осы ауқымды саланы жандандырып, алға жылжытуда құрылысшылардың еңбегі ерен. Олар қазіргі заманға сай іскер де қабілетті маман ретінде өзгелерге үлгі-өнеге болып, мемлекетіміздің әлеуметтік-экономикалық деңгейінің артуына айтарлықтай еңбек сіңіруде. Құрылысшылар өмірге деген белсенді қөзқарастағы жандар болғандықтан, олардың кәсіпқойлықтары мен шеберліктерінің арқасында жаңа үйлер, мектептер, аурухана, жолдар салынып жатыр. Сол үшін де олардың әрбір жасаған істері мақтауға тұрарлық–деп, ауданымыздағы барша құрылысшылар қауымын төл мерекелерімен құттықтады.
Света Үсенқұлова.
